Congress | హైదరాబాద్, జూన్ 26 (నమస్తే తెలంగాణ) : ఏటా జాబ్క్యాలెండర్తో రెండు లక్షల ఉద్యోగాలు భర్తీ చేస్తమన్నది. నిరుద్యోగభృతి ఇస్తమన్నది. గ్రూప్స్ పోస్టులు పెంచుతమన్నది.నిరుద్యోగుల జేఏసీ యాత్ర పేరుతో ఎన్నికల ప్రచారం చేయించింది. అన్నితీర్లా వాడుకొని అందలమెక్కాక ముఖం చాటేసింది. రోడ్డుపైకి వచ్చి ఆందోళన చేస్తున్నా,కాళ్లు మొక్కినా, మోకాళ్లపై ఉండి అర్థించినా కనికరించడంలేదు.
నిరుద్యోగులు పోరుబాటపడితే అణచివేతకు ప్రయత్నిస్తున్నది. వినతులు, విజ్ఞాపనలు ఇచ్చి విసిగిపోయిన నిరుద్యోగులు ఇందిరాపార్క్ వద్ద మహాధర్నా చేపట్టారు. టీజీపీఎస్సీ ఆఫీస్ను ముట్టడించారు. తమకు న్యాయం చేయలేని ప్రభుత్వం దిగిపోవాలని హెచ్చరించారు.నిరసన తెలుపుతున్నవారితో ప్రభుత్వం మాట్లాడటం, చర్చలు జరపడం సంప్రదాయం. రేవంత్ సర్కారు ఏమాత్రం స్పందన లేకుండా ఉండటంపై నిరుద్యోగుల్లో ఆగ్రహం కట్టలు తెంచుకుంటున్నది.
ప్రధాన డిమాండ్లు ఇవీ..
రిలింక్విష్మెంట్ చేపట్టాలి
గురుకుల పోస్టుల భర్తీలో రిలింక్విష్మెంట్ చేపట్టాలని నిరుద్యోగులు గొంతుచించుకుంటున్నారు.అవరోహణ పద్ధతిలో పోస్టులు భర్తీచేయాలని ఉద్యమిస్తున్నారు. కానీ కాంగ్రెస్ సర్కారు అసంబద్ధంగా హైలెవల్ క్యాడర్ పోస్టులను ముందు భర్తీ చేయకుండా లోలెవల్ పోస్టులను ఆరోహణ పద్ధతిలో భర్తీచేసింది. దీంతో ఒకే అభ్యర్థికి మూడు, నాలుగు ఉద్యోగాలు రాగా, చాలా మంది ఉద్యోగాలు రాకుండా నష్టపోయారు. ఆరోహణ క్రమంలో ఉద్యోగాలు భర్తీచేయాలని అభ్యర్థులు కలవని మంత్రిలేడు. ఐదునెలలుగా గగ్గోలు పెడుతున్నా ప్రభుత్వం పట్టించుకోవడం లేదు.