Asifabad | కుమ్రం భీం ఆసిఫాబాద్, జూలై 15 (నమస్తే తెలంగాణ) : అమ్మ ఆదర్శ పాఠశాల అభివృద్ధి పనుల కోసం మంజూరైన నిధుల విషయంలో ఇద్దరు ఉపాధ్యాయులు గొడవపడ్డారు. విద్యార్థుల ఎదుటే బూతులు తిట్టుకుంటూ చెప్పులతో కొట్టుకొట్టుకునే స్థాయికి వెళ్లారు. దీనికి సంబంధించి గ్రామస్థులు, విద్యార్థులు తెలిపిన వివరాల ప్రకారం.. కుమ్రం భీం ఆసిఫాబాద్ జిల్లా ఆసిఫాబాద్ మండలం సాలెగూడా ప్రభుత్వ ప్రాథమిక పాఠశాల అమ్మ ఆదర్శ పథకం కింద ఎంపికైంది.
ఇందుకోసం రూ.7.25 లక్షలు మంజూరయ్యాయి. హెచ్ఎం ఆనంద్రావు 20 రోజులుగా అనారోగ్య కారణాలతో సెలవులో ఉన్నాడు. మరో ఉపాధ్యాయుడు తిరుపతికి ఇన్చార్జి హెచ్ఎంగా బాధ్యతలు అప్పగించారు. సోమవారం హెచ్ఎం ఆనంద్రావు పాఠశాలకు వచ్చాడు. అమ్మ ఆదర్శ నిధుల విషయంలో హెచ్ఎం ఆనందరావు, ఇన్చార్జి హెచ్ఎం తిరుపతికి మధ్య మాటామాటా పెరిగి గొడవకు దారితీసింది. బూతులు తిడుతూ చెప్పులు చూపిస్తూ, రాళ్లతో దాడికి ఆనంద్రావు ప్రయత్నించాడు. విషయం తెలుసుకుని గ్రామస్థులు అక్కడికి వచ్చి గొడవను ఆపారు. పాఠశాలకు తాళం వేసి ఉన్నతాధికారులకు సమాచారం అందించారు.
హెచ్ఎం ఆనందర్రావు ఇష్టానుసారంగా పనులు చేపట్టాడని, పాఠశాల మరమ్మతుల కోసం తెచ్చిన సామగ్రిని తమ ముందే ఆటోలో తరలించుకుపోయాడని గ్రామస్థులు ఆరోపిస్తున్నారు. నిధుల వాటా అందకపోవడంతో హెచ్ఎం ఆనంద్రావు గొడవకు దిగాడని పేర్కొంటున్నారు. ఈ విషయమై ఎంఈవో మనుకుమార్ను వివరణ కోరగా.. మంగళవారం గ్రామస్థుల సమక్షంలో విచారణ చేపడుతామని తెలిపారు.