చిల్పూరు/కాటారం, జూలై 10: సాగు కోసం చేసిన అప్పులు తీరక, పెట్టుబడి సాయం అందక, రుణమాఫీ కాకపోవడంతో తీవ్ర మనోవేదనకు గురైన ఇద్దరు రైతులు పురుగుల మందు తాగి ఆత్మహత్య చేసుకున్నారు. జనగామ జిల్లా చిల్పూరు మండల కేంద్రంలోని కొండాపూర్కు చెందిన మోతె రాజు (37)కు 3 ఎకరాల 20 గుంటల భూమి ఉన్నది. మూడు, నాలుగేండ్లుగా పంటల సాగు కోసం సుమారు రూ.5 లక్షల వరకు అప్పు చేశాడు. అప్పులు తీర్చలేనని మనోవేదనకు గురైన రాజు బుధవారం పురుగుల మందు తాగాడు. గమనించిన భార్య వెంటనే 108 వాహనంలో ఎంజీఎం దవాఖానకు తరలిస్తుండగా మార్గమధ్యంలోనే మృతిచెందాడు. రాజుకు భార్య, ఇద్దరు కుమారులు, కుమార్తె ఉన్నారు.
బస్వాపూర్లో కౌలురైతు బలవన్మరణం
భూపాలపల్లి జిల్లా కాటారం మండలం బస్వాపూర్కు చెందిన కళ్లెం లింగయ్య (35) రెండున్నర ఎకరాల భూమి కౌలుకు తీసుకుని రెండేండ్లుగా పత్తి సాగు చేస్తున్నారు. సుమారు రూ.4 లక్షల వరకు అప్పులు అయ్యాయి. అప్పులు తీర్చలేక, కుటుంబాన్ని పోషించే మార్గం కనిపించక మంగళవారం రాత్రి లింగయ్య పురుగుల మందు తాగాడు. కుటుంబ సభ్యులు గమనించి భూపాలపల్లి దవాఖానకు తరలించగా చికిత్స పొందుతూ బుధవారం మృతి చెందినట్టు ఎస్సై తెలిపారు.
నేతన్న ఆత్మహత్యాయత్నం
సిరిసిల్ల రూరల్, జూలై 10: చేనేత కార్మికుడు ఆత్మహత్యాయత్నానికి పాల్పడిన ఘటన రాజన్న సిరిసిల్ల జిల్లాలో చోటుచేసుకున్నది. తంగళ్లపల్లి మండలం లోని కేసీఆర్నగర్కు చెందిన గాజుల వేణు, వైష్ణవి దంపతులు. వీరికి ఇద్దరు కొడుకులు. వస్త్ర పరిశ్రమలో వైపని కార్మికుడిగా పనిచేస్తూ కుటుంబాన్ని పోషించుకుంటున్నాడు. వైష్ణవి బీడీలు చుడుతూ భర్తకు చేదోడు.. వాదోడుగా ఉంటున్నది. వస్త్ర పరిశ్రమ సంక్షోభంలో కూరుకుపోవడంతో ఉపాధిలేక వేణు సతమతమవుతున్నాడు. గతంలో తీసుకున్న సూక్ష్మ రుణా ల వాయిదాలు చెల్లించలేకపోతున్నాడు. దీంతో మనస్తాపం చెంది బుధవారం ఇంట్లోనే ఉరి వేసుకుని ఆత్మహత్యాయత్నానికి పాల్పడ్డాడు. కుటుంబ సభ్యులు సిరిసిల్ల దవాఖానకు తరలించారు. త్రుటిలో ప్రాణాపాయం నుంచి బయటపడినట్టు స్థానికులు తెలిపారు.