Mahabubabad | కొత్తగూడ, జూన్ 7 : మహబూబాబాద్ జిల్లా కొత్తగూడ ఏజెన్సీలోని ఓ గిరిజన గూడేనికి చెందిన ఇద్దరు వివాహిత మహిళలు గ్రామం నుంచి పరారై ఒక్కటయ్యారనే వార్త దావానలంలా వ్యాపించింది. ఈ విషయం సోషల్ మీడియాలో వైరల్ అవుతున్నది. గ్రామస్థులు తెలిపిన వివరాల ప్రకారం.. మహబూబాబాద్ జిల్లా కొత్తగూడ మండల కేంద్రానికి 10 కిలోమీటర్ల దూరంలో ఉన్న ఓ గిరిజన గూడేనికి చెందిన ఇద్దరు వివాహితలు గ్రామం నుంచి పరారయ్యారు.
వారిలో ఒక మహిళకు భర్త, ఇద్దరు పిల్లలు ఉన్నారు. మరో మహిళకు భర్త, కొడుకు ఉండగా, ఇటీవల అనారోగ్యంతో కొడుకు మృతిచెందాడు. కాగా, వీరిద్దరూ ఆరునెలల క్రితం గ్రామం నుంచి పరారై భద్రాద్రి కొత్తగూడెం జిల్లా గుండాల మండల ప్రాంతంలో రహస్యంగా జీవిస్తున్నారు.
ఒకరు పురుషుడిలా, మరొకరు మహిళలా ఉంటూ సహజీవనం చేస్తున్నారు. ఆ ఇద్దరు మహిళల్లో ఒకరి భర్త భార్య కోసం వెతుక్కుంటూ వారు ఉండే ప్రాంతానికి చేరుకున్నాడు. ఐదు రోజుల క్రితం వారిని గ్రామానికి తీసుకొచ్చి స్థానికుల సమక్షంలో పంచాయితీ పెట్టారు. అయినా, వారు పెద్దమనుషుల మాటను లెక్క చేయకుండా తమకు నచ్చిన విధంగా ఉంటామని చెబుతున్నట్టు తెలుస్తున్నది. దీంతో ఏం చేయాలో అర్థం కాని పరిస్థితులో గ్రామ పెద్దలు ఉన్నారు. ప్రస్తుతానికి సదరు మహిళలు అదే గ్రామంలోని తమ తల్లిగారి ఇండ్లల్లో ఉన్నారు.