NIN | హైదరాబాద్ : మధుమేహ వ్యాధిగ్రస్థుల్లో కంటి శుక్లాల పరిపక్వతను తగ్గించే శక్తి భారతీయ సంప్రదాయ ఆహారం, ఆయుర్వేద మందుల్లోనే ఉంది. పసుపు, ఉసిరి, మిరియాలు, దాల్చిన చెక్క, మెంతులు, అల్లం మిశ్రమంతోపాటు మొక్కల ఆధారిత ఆహారాన్ని వినియోగించడం వల్ల కంటి శుక్లాల పరిపక్వత తీవ్ర స్థాయికి చేరే వేగాన్ని తగ్గించే అవకాశం ఉంది. జాతీయ పోషకాహార సంస్థ (NIN) శాస్త్రవేత్తల పరిశోధనలో ఈ విషయం వెల్లడైంది. మధుమేహ రోగులు మొక్కల ఆధారిత దినుసులను వినియోగించడం వల్ల కేటరాక్ట్తో పాటు అనేక ఇతర అస్వస్థతలను కూడా నిరోధించవచ్చునని శాస్త్రవేత్తలు వివరించారు.
పైన పేర్కొన్న ఆరు దినుసులను తినడం వల్ల డయాబెటిక్ కేటరాక్ట్లను నిరోధించవచ్చునని, కేటరాక్ట్ మెచ్యురేషన్ వేగాన్ని తగ్గించవచ్చునని తేలింది. ఇతర వ్యాధులతో బాధపడేవారితో పోల్చుకుంటే, మధుమేహ వ్యాధిగ్రస్థులకు కేటరాక్ట్ వచ్చే అవకాశాలు మూడు నుంచి నాలుగు రెట్లు ఎక్కువగా ఉంటాయి. వీరి కంటిలో శుక్లం ఏర్పడిన తర్వాత వృద్ధి చెందే అవకాశాలు కూడా ఎక్కువగానే ఉంటాయి. డయబెటిస్ లేనివారితో పోల్చుకున్నపుడు, మధుమేహ వ్యాధిగ్రస్థులకు కేటరాక్ట్ సర్జరీ చేస్తే, డయాబెటిక్ రెటినోపతీ వేగంగా వృద్ధి చెందుతుందని, అంతిమంగా దృష్టిని కోల్పోవడానికి దారి తీస్తుందని అధ్యయనాలు చెప్తున్నట్లు పరిశోధకులు తెలిపారు.