TS LAWCET & PGLCET-2024 : తెలంగాణ లాసెట్, పీజీఎల్ సెట్ (TS LAWCET & PGLCET-2024) పరీక్షలు జూన్ 3న జరగనున్నాయి. ఈ మేరకు ఉస్మానియా యూనివర్సిటీ ఒక ప్రకటన విడుదల చేసింది. తెలంగాణ ఉన్నత విద్యామండలి తరఫున ఉస్మానియా యూనివర్సిటీ ఈ పరీక్షలను నిర్వహిస్తున్నది. జూన్ 3న మొత్తం మూడు సెషన్లలో ఈ పరీక్షలను నిర్వహించనున్నారు. రిజిస్టర్ అయిన అభ్యర్థులు https://lawcet.tsche.ac.in/ వెబ్సైట్ నుంచి హాల్ టికెట్లను డౌన్లోడ్ చేసుకోవచ్చని ఇప్పటికే ప్రకటించారు.
కాగా జూన్ 3న.. సెషన్-1 పరీక్ష ఉదయం 9 గంటల నుంచి 10.30 గంటల వరకు, సెషన్-2 పరీక్ష మధ్యాహ్నం 12.30 నుంచి 2.00 గంటల వరకు, సెషన్-3 పరీక్ష సాయంత్రం 4 గంటల నుంచి 5.30 గంటల వరకు జరగనుంది. TS LAWCET & PGLCET పరీక్షలు తొలి రెండు సెషన్లలో మొత్తం 68 కేంద్రాల్లో నిర్వహిస్తారు. అందులో 64 కేంద్రాలు తెలంగాణలో, 4 కేంద్రాలు ఏపీలో ఉన్నాయి.
మూడో సెషన్ పరీక్షలను మొత్తం 50 కేంద్రాల్లో నిర్వహించనున్నారు. అందులో 46 కేంద్రాలను తెలంగాణలో, 4 కేంద్రాలను ఆంధ్రప్రదేశ్లో ఏర్పాటు చేశారు. టీఎస్లాసెట్, పీజీఎల్సెట్ పరీక్షల కోసం మొత్తం మొత్తం 50,684 మంది దరఖాస్తు చేసుకున్నారు. వారిలో టీఆఎస్ లాసెట్ మూడేళ్ల కోర్సు కోసం దరఖాస్తు చేసుకున్న వారు 36,079 మంది, ఐదేళ్ల కోర్సు కోసం దరఖాస్తు చేసుకున్నవాళ్లు 10,197 మంది, ఎల్ఎల్ఎం పరీక్ష కోసం దరఖాస్తు చేసుకున్న వాళ్లు 4,408 మంది ఉన్నారు.
ఈ పరీక్షలు తెలుగు, ఇంగ్లిష్, ఉర్దూ వెర్షన్లలో రాసుకోవచ్చు. ఈ పరీక్షకు కూడా ఒక నిమిషం నిబంధన వర్తిస్తుంది. కాబట్టి అభ్యర్థులందరూ ఒక గంట ముందే పరీక్షా కేంద్రాలకు చేరుకోవాలని సూచించారు.