హైదరాబాద్, మార్చి 12 (నమస్తే తెలంగాణ): బీఆర్ఎస్ అనుబంధంగా కార్మిక విభాగాన్ని (టీఆర్ఎస్కేవీ) భారత రాష్ట్ర ట్రేడ్ యూనియన్ (బీఆర్టీయూ)గా మార్చినట్టు ఆ విభాగం రాష్ట్ర అధ్యక్షుడు రాంబాబు యాదవ్ తెలిపారు. ఇకపై బీఆర్టీయూ దేశవ్యాప్తంగా పనిచేస్తుందని వెల్లడించారు. ఆదివారం తెలంగాణ భవన్లో బీఆర్టీయూ రాష్ట్ర కమిటీ సమావేశం, అంతర్జాతీయ మహిళా దినోత్సవాన్ని పురస్కరించుకొని శ్రామిక మహిళలను సన్మానించారు. ఈ సందర్భంగా రాంబాబు మాట్లాడారు. సీఎం కేసీఆర్ ఆదేశాల మేరకు బీఆర్టీయూగా మార్చినట్టు తెలిపారు. అంగన్వాడీ టీచర్స్ అండ్ హెల్పర్స్ యూనియన్ కూడా బీఆర్టీయూకు అనుబంధంగా పని చేస్తుందని యూనియన్ రాష్ట్ర అధ్యక్షురాలు నల్ల భారతి చెప్పారు. అనంతరం శ్రామి క మహిళా రాష్ట్ర నాయకులు వేదవతి, సంతోష, సునీత, కరుణ, అనురాధ, శోభారాణి, బాబాయమ్మ, మంజులతో పాటు 40 మంది మహిళలను సన్మానించారు. ఈ కార్యక్రమంలో బీఆర్ఎస్ రాష్ట్ర కమిటీ సభ్యుడు ఎల్ రూప్సింగ్, బీఆర్టీయూ రాష్ట్ర ప్రధాన కార్యదర్శి పీ నారాయణ, అన్ని జిల్లాల ట్రేడ్ యూనియన్, వివిధ రంగాల అధ్యక్షులు, ప్రధాన కార్యదర్శులు, రాష్ట్ర కమిటీ సభ్యులు తదితరులు పాల్గొన్నారు.