జయశంకర్ భూపాలపల్లి. మే 24 (నమస్తే తెలంగాణ): జయశంకర్ భూపాలపల్లి జిల్లాలోని భూపాలపల్లి మండలం కమలాపూర్ కొనుగోలు కేంద్రం నుంచి ధాన్యం కొనుగోలు ప్రారంభమైంది. శుక్రవారం మాజీ మంత్రి, ఎమ్మెల్యే తన్నీరు హరీశ్రావు కమలాపూర్ ధాన్యం కొనుగోలు కేంద్రాన్ని సందర్శించారు. అక్కడ వర్షానికి తడిసి ఉన్న ధాన్యాన్ని, రైతుల బాధలు చూసి చలించిపోయారు. హరీశ్రావు ముందు రైతులు తమ బాధలు ఏకరువు పెట్టుకొన్నారు. 20 రోజులుగా కేంద్రంలోనే ధాన్యం ఉంటుందని, వర్షానికి తడుస్తూ, ఎండకు ఎండుతూ మొలకలు వస్తున్నాయని, బోనస్ మాట దేవుడెరుగు ముందు మా ధాన్యాన్ని కొనుగోలు చేయాలని వాపోయారు. మల్లికాంబ అనే మహిళా రైతు హరీశ్రావు ముందు తన కష్టాలు చెబుతూ కన్నీరుమున్నీరైంది. వెంటనే అప్పుడే జాయింట్ కలెక్టర్తో హరీశ్రావు మాట్లాడారు. నిర్వాహకులు ధాన్యాన్ని కొనుగోలు ప్రారంభించారు. మూడు లారీల్లో ధాన్యాన్ని రైస్ మిల్లులకు తరలించారు. దీంతో రైతులు ఆనందం వ్యక్తం చేశారు.