మంచిర్యాల, జూన్ 18 (నమస్తే తెలంగాణ ప్రతినిధి): కరెంట్ లేక మంచిర్యాల పట్టణం అంధకారమైంది. మంచిర్యాల జిల్లా కేంద్రంలోని సాయికుంట, శ్రీశ్రీనగర్, రాజరాజేశ్వర కాలనీ, కాకతీయ కాలనీ, తోళ్లవాగు ఏరియా, చున్నంబట్టి వాడ (మంచిర్యాల టౌన్-3)లో మంగళవారం సాయంత్రం 6 గంటలకు కరెంట్ పోయింది. దీనిపై ఆయా ప్రాంతాల వాసులు ట్రాన్స్కో ఏఈ నర్సయ్యకు ఫోన్ చేయగా.. సమస్య ఏంటో తెలియడం లేదని సమాధానం చెప్పినట్టు సమాచారం. నెల రోజులుగా రోజూ తమ ప్రాంతాల్లో కరెంట్ పోతుందంటూ కాలనీల వాసులు వాపోతున్నారు. ఓ రోజు ట్రాన్స్ఫార్మర్ రిపేర్ అని, తెల్లారి ట్రాన్స్ఫార్మర్ ట్రిప్ అయిందని, చెట్లు నరకుతున్నామని, వైర్లు జాయింట్ అయ్యాయని ఇలా ఏదో ఒక సమస్య చెప్తున్నారని తెలిపారు. మంగళవారం కరెంట్ పోయిన విషయంపై అధికారులను అడిగితే రాజీవ్నగర్ సబ్స్టేషన్ నుంచి వచ్చే మెయిన్ లైన్లో ఏదో ప్రాబ్లమ్ ఉందని చెప్పారు. ఎక్కడ సమస్య వచ్చిందో వెతుకుతున్నామని, కాసేపు అయ్యాక వస్తుందని రాత్రి 10 గంటలకు లైన్మెన్లు చెప్పినట్టు ఆయా కాలనీవాసులు పేర్కొన్నారు. ఈ విషయంపై ‘నమస్తే తెలంగాణ’ విద్యుత్తు శాఖ ఏడీ వేణుగోపాల్కు రెండు సార్లు ఫోన్ చేయగా ఆయన స్పందించ లేదు. అధికారులు కనీసం సమాధానం చెప్పే పరిస్థితుల్లో లేకపోవడంపై స్థానికులు మండిపడుతున్నారు. గడిచిన పదేండ్లలో ఏ నాడూ రెప్పపాటు కూడా కరెంట్ పోలేదని, కొద్ది రోజులుగా ప్రతి రోజూ కరెంట్తో ఇదే సమస్య వస్తున్నదని కాలనీల వాసులు వాపోతున్నారు.