Tithi Bhojan | హైదరాబాద్, జూలై 26 (నమస్తే తెలంగాణ): తెలంగాణ సంస్కృతి, సంప్రదాయాల పట్ల ఏమాత్రం సోయిలేకుండా ప్రభుత్వం నిర్ణయించిన ఒక పేరు తీవ్ర వివాదస్పదమైంది. మధ్యాహ్న భోజన పథకంలో భాగంగా ఈ నెల 30 నుంచి పాఠశాలల్లో ‘తిథి భోజనం’ అనే కొత్త కార్యక్రమం ప్రారంభించాలని, ఇందుకు తగిన ఏర్పాట్లు చేయాలని పాఠశాల విద్యాశాఖ డైరెక్టర్ నరసింహారెడ్డి శుక్రవారం డీఈవోలకు ఆదేశాలు జారీచేశారు. ‘తిథి భోజనం’లో భాగంగా పిల్లలకు పౌష్టికాహారం, ఆరోగ్యవంతమైన ఆహారాన్ని అదనపు ఆహార పదార్థంగా అందించాలని ఆదేశించారు. పాఠశాలలవారీగా కమ్యూనిటీ సభ్యులు ప్రత్యేక సందర్భాల్లో లేదా పండుగ రోజుల్లో అదనపు పదార్థంగా, పూర్తి భోజనంగా స్వీట్లు, పండ్లు, నామ్కీన్ వంటి రూపాల్లో అందించాలని సూచించారు. అయితే, పండుగలు లాంటి ప్రత్యేక సందర్భాల్లో బడి పిల్లలకు పెట్టే భోజనానికి ‘తిథి భోజనం’ అనే పేరు పెట్టడం పట్ల ఉపాధ్యాయులు, తల్లిదండ్రులు తీవ్ర ఆగ్రహం వ్యక్తంచేస్తున్నారు.
చనిపోయినవారికి ఏడాదికోసారి పెట్టే తద్దినాన్ని ‘తిథి’ అంటారనే కనీస సోయి లేకుండా బడి పిల్లలకు పెట్టే భోజనానికి ‘తిథి భోజనం’ అనే పేరు పెట్టడమేమిటని తీవ్ర అభ్యంతరం వ్యక్తంచేస్తున్నారు. అశుభ దినాలకు ఉద్దేశించిన పదాన్ని బడి పిల్లల భోజనానికి పెట్టడం తగదని, మరో పేరు నిర్ణయించాలని పలువురు విజ్ఞులు సూచిస్తున్నారు. చివరకు వామపక్ష భావజాలం ఉన్న యూటీఎఫ్ టీఎస్ రాష్ట్ర నాయకుడు చావ రవి కూడా ‘తిథి భోజనం’ అనే పేరు పెట్టడం సమంజసం కాదని, ఈ పేరును తక్షణమే మార్చాలని సూచించారు. విద్యార్థుల తల్లిదండ్రులు, ఉపాధ్యాయులు, ఉపాధ్యాయ సంఘాల ప్రతినిధిల నుంచి కూడా అభ్యంతరాలు వ్యక్తమవుతున్నా విద్యాశాఖ అధికారులు మాత్రం సానుకూలంగా స్పందించడం లేదు.
ఈ పేరును కేంద్ర ప్రభుత్వం పెట్టిందని, ఇది సంస్కృత పదమని, దీనికి మంచి అర్థమే ఉన్నదని, ఈ పేరు పట్ల అభ్యంతరాలు పెట్టాల్సిన అవసరం ఉండకపోవచ్చని సమర్థించుకుంటున్నారు. తిథి భోజనం వల్ల పాఠశాల, స్థానిక ప్రజల మధ్య సత్సంబంధాలను పెంపొందిస్తుందని, అన్ని వర్గాల పిల్లల్లో సమానత్వ భావన కలుగడానికి సహాయపడుతుందని విద్యాశాఖ డైరెక్టర్ జారీ చేసిన ఉత్తర్వుల్లో పేర్కొన్నారు. సప్లిమెంటరీ న్యూట్రీషన్ల ద్వారా ‘తిథి భోజనం’ పాఠశాల పిల్లల రోగనిరోధక శక్తిని బలోపేతం చేయడానికి దోహదపడుతుందని తెలిపారు. ‘తిథి భోజనం’ అమలు కోసం తిథి భోజన కార్యక్రమాన్ని జియోట్యాగ్ చేసిన ఫోటోలు కేంద్ర ప్రభుత్వానికి సంబంధించిన గూగుల్ డ్రైవ్లో అప్లోడ్ చేయాలని ఆదేశించారు. మధ్యాహ్న భోజన పథకంలో భాగంగా కేంద్ర ప్రభుత్వం ప్రవేశపెట్టిన ‘పీఎం పోషణ్’ కార్యక్రమంలో భాగంగా ‘తిథి భోజనం’ అమల్లోకి తీసుకొస్తున్నట్టు వెల్లడించారు.