గద్వాల అర్బన్, మే 28 : టిమ్స్ ట్రబుల్ ఇవ్వడంతో గద్వాల డిపో నుంచి దాదాపు గంటకుపైగా బస్సులు బయటకు రాలేదు. ప్రయాణికులు తెలిపిన వివరాల ప్రకారం.. విధులు నిర్వర్తించేందుకు డ్రైవర్లు, కండక్టర్లు, మిగతా ఉద్యోగులు మంగళవారం వేకువజామున గద్వాల డిపోకు చేరుకున్నారు.
మొదటగా వివిధ రూట్లకు వెళ్లాల్సిన బస్సుల కండక్టర్లకు ఇవ్వాల్సిన టిమ్స్లో సమస్యలు ఉత్పన్నమయ్యాయి. దాదాపు గంటసేపు ఒక్క బస్సు కూడా డిపో నుంచి కదల్లేదు. దీంతో ప్రయాణికులు తీవ్ర ఇబ్బందులు పడ్డారు. విషయం తెలుసుకున్న డిపో మేనేజర్ మంజుల సమస్య పరిష్కారానికి కృషి చేశారు. జియో నెట్వర్క్ సేవల్లో అంతరాయం ఏర్పడటంతో సమస్య తలెత్తిందని, నెట్వర్క్ అధికారులను సంప్రదించి సమస్యను పరిష్కరించినట్టు ఆమె పేర్కొన్నారు.