నల్లగొండ : అక్రమ గంజాయి(Ganja) తరలిస్తున్న ముగ్గురు వ్యక్తులను పోలీసులు అరెస్ట్ చేశారు. నిందితుల వద్ద నుంచి 73.825 కేజీల గంజాయి, 5 సెల్ ఫోన్లు, ఓ కారును స్వాధీనం చేసుకున్నారు. ఈ మేరకు వివరాలను నల్లగొండ(Nallgonda) డీఎస్పీ శివరాం రెడ్డి మీడియాకు వెల్లడించారు. తెలంగాణలో డ్రగ్స్ నిర్మూలన ప్రత్యేక డ్రైవ్లో భాగంగా పోలీసులు ముమ్మర తనిఖీలు చేపట్టినట్టు ఆయన పేర్కొన్నారు. విజయవాడ-హైదరాబాద్ జాతీయ రహదారి గుండా గంజాయి తరలిస్తున్నారనే సమాచారం మేరకు కొర్లపహాడ్ చెక్ పోస్ట్ వద్ద వాహనాలు తనిఖీ చేసినట్లు తెలిపారు.
అనుమానస్పదంగా వెళ్తున్న ఓ కారును ఆపి తనిఖీ చేయగా గంజాయి పట్టుబడిందన్నారు. పట్టుబడిన గంజాయి విలువ సుమారు 18,45,625 రూపాయలు ఉంటుందని చెప్పారు. నిందితులు అశోక్ కుమార్, దీపు కుమార్, సుష్మా రాయ్ని అరెస్ట్ చేసి దర్యాప్తు చేపట్టామన్నారు. ఎవరైనా గంజాయి అమ్మినా, రవాణా చేసినా కఠిన చర్యలు తీసుకుంటామని హెచ్చరించారు. మత్తు బారిని పడి యువత భష్యత్ను నాశనం చేసుకోవద్దన్నారు.