మంచిర్యాల ఏసీసీ, మే 13: ప్రమాదవశాత్తు ప్రహరీ కూలి ముగ్గురు కూలీలు మృతి చెందారు. గురువారం మంచిర్యాల జిల్లా కేంద్రంలోని బెల్లంపల్లి చౌరస్తాలో నందిని దవాఖాన సమీపంలో నూతన భవనం నిర్మిస్తున్నారు. కుమ్రం భీం ఆసిఫాబాద్ జిల్లా చింతలమానేపల్లి మండల కేంద్రానికి చెందిన గోళెం పోషం (50), రుద్రాపూర్కు చెందిన హన్మంతు (35), బాబాపూర్కు చెందిన ఆత్రం శంకర్ (40), కౌటాల మండలం గుడ్లబోరి చెందిన మైదం రాములు పనిచేసేందుకు వచ్చారు.
కొత్త భవనం పక్కన ప్రహరీ, దాని పక్కనున్న మరో ఇంటి ప్రహరీ మధ్యన మధ్యనున్న మట్టిని తొలగించి, బండరాళ్లు, ఇసుకతో నింపుతుండగా శిథిలావస్థలో ఉన్న ప్రహరీ వారిపై కూలింది. దీంతో పోషం, హన్మంతు, శంకర్ అక్కడికక్కడే మృతి చెందారు. గాయపడ్డ రాములును దవాఖానకు తరలించారు. మంచిర్యాల పట్టణ సీఐ బన్సీలాల్ ఘటనా స్థలానికి చేరుకొని మృతదేహాలను పొక్లెయిన్ సాయంతో వెలికితీశారు.
మృతుల కుటుంబ సభ్యులు తమకు న్యాయం చేయాలంటూ మృతదేహాలతో రోడ్డుపై బైఠాయించారు. రామగుండం సీపీ శ్రీనివాస్, ఏసీపీ ప్రకాశ్, అదనపు కలెక్టర్ రాహుల్, ఆర్డీవో రాములు, మున్సిపల్ కమిషనర్ మారుతీప్రసాద్ ఘటనా స్థలానికి చేరుకుని బాధితులకు న్యాయం చేస్తామని హామీ ఇచ్చారు. బిల్డింగ్ అనుమతులను వెంటనే రద్దు చేయాలని అదనపు కలెక్టర్ మున్సిపల్ కమిషనర్కు ఆదేశాలు ఇచ్చారు.