TSRTC | హైదరాబాద్, అక్టోబర్ 25 (నమస్తే తెలంగాణ): టీఎస్ఆర్టీసీకి ఈ దసరా పండుగ మంచి ఆమ్దానీ తెచ్చిపెట్టింది. దసరాకు సంస్థ ప్రత్యేక బస్సులు ఏర్పాటు చేయగా, కోట్ల వర్షం కురిపించింది. కేవలం 11 రోజుల్లోనే సుమారు రూ.25 కోట్ల వరకు అదనపు ఆదాయం వచ్చింది. పండుగ కోసం ఏపీ, కర్ణాటక రాష్ర్టాలకు 5,500 ప్రత్యేక బస్సులను ఆర్టీసీ నడిపింది. నిరుడుతో పోలిస్తే ఈ ఏడాది అదనంగా మరో 1,302 సర్వీసులు ఏర్పాటు చేసింది. ఎంజీబీఎస్, జేబీఎస్లతో పాటు నగరంలోని అన్ని పికప్ పాయింట్ల నుంచి బస్సులు అందుబాటులో ఉంచింది. అయితే.. ఈ సారి సాధారణ చార్జీలే వసూలు చేసింది. ప్రైవేట్ ట్రావెల్స్ కన్నా తక్కువగా చార్జీ చేయడంతో ప్రయాణికులు ఆర్టీసీ వైపు మొగ్గు చూపారు.
రోజుకు రూ.2 కోట్లు అదనం
పండుగ సందర్భంగా 11 రోజుల పాటు సంస్థ ప్రత్యేక బస్సులు నడిపింది. సాధారణంగా రోజూ ఆర్టీసీకి సుమారు 12 నుంచి 13 కోట్ల ఆదాయం సమకూరగా, దసరా పండుగకు మాత్రం ప్రతిరోజూ అదనంగా 2 కోట్ల నుంచి 3 కోట్ల వరకు వచ్చినట్లు తెలుస్తోంది. ఒక్కో రీజియన్కు సరాసరిగా సుమారు రూ.2 కోట్ల నుంచి రెండున్నర కోట్ల వరకు అదనపు ఆదాయం వచ్చినట్టు అధికారులు అంచనా వేశారు.