నమస్తే తెలంగాణ నెట్వర్క్, మే 25 : రాష్ట్రవ్యాప్తంగా శనివారం పలుచోట్ల మోస్తరు వర్షం కురవగా, కొన్ని ప్రాంతాల్లో గాలివాన బీభత్సం సృష్టించింది. ఈదురుగాలులతో వర్షం కురవడంతో రోడ్లపై చెట్లు విరిగిపడి వాహనాల రాకపోకలకు తీవ్ర అంతరాయం ఏర్పడింది. విద్యుత్ వైర్లు తెగిపడి, ట్రాన్స్ఫార్మర్లు కూలిపోవడంతో కరెంటు సరఫరా నిలిచిపోయింది. పలుచోట్ల ఇండ్ల పైకప్పులు, రేకులు లేచిపోయాయి. చెట్లు విరిగిపడడంతో కొన్నిచోట్ల కార్లు, ఇండ్లు ధ్వంసమయ్యాయి. జగిత్యాల జిల్లా మల్లాపూర్ మండలకేంద్రంతో పాటు రత్నాపూర్, మేడిపల్లి మండలంలోని దమ్మన్నపేట, దేశాయిపేట, కథలాపూర్ మండలంలోని గంభీర్పూర్, తాండ్య్రాల, పెద్దపల్లి జిల్లా ఓదెల,నాంసానిపల్లి, లంబాడితండా, సిరిసిల్ల, చందుర్తి మండలం, ముస్తాబాద్ మండల కేంద్రం, బందనకల్, గూడెం, ఎల్లారెడ్డిపేట మండల కేంద్రం, వెంకటాపూర్, హరిదాస్నగర్, పదిర, అక్కపల్లిలో గాలివాన కురిసింది.
పిడుగుపాటుతో లారీ డ్రైవర్ మృతి
జగిత్యాల జిల్లా మల్లాపూర్ మండల కేంద్రంలో ఓ ఎరువుల దుకాణంలో మందు బస్తాలను దింపే క్రమంలో ప్రమాదవశాత్తు జగిత్యాలకు చెందిన లారీ డ్రైవర్ మహమ్మద్ ఖదీర్(50) పిడుగుపాటుకు గురై గుండెపోటుతో అక్కడికక్కడే మృతి చెందాడు. ఏఎస్ఐ లచ్చయ్య ఘటనాస్థలానికి చేరుకుని కారణాలను అడిగి తెలుసుకున్నారు. కేసు దర్యాప్తు చేస్తున్నట్టు పేర్కొన్నారు.
రైతు మృతి..
ఉమ్మడి మహబూబ్నగర్ జిల్లాలో పలుచోట్ల శుక్రవారం అర్ధరాత్రి పెద్దఎత్తున ఈదురుగాలులు, వర్షం కురిసింది. సుమారు 150 వరకు విద్యుత్ స్తంభాలు, నాలుగు ట్రాన్స్ఫార్మర్లతోపాటు చెట్లు నేలకొరిగాయి. అచ్చంపేట మండలం చెన్నారం శివారులోని జిన్నింగ్ మిల్లులో రాఫ్టర్లు విరిగిపడి రేకులు ధ్వంసమయ్యాయి. సూర్యతండాలో కోళ్ల షెడ్డు పైకప్పు రేకులు ఎగిరిపోయాయి. మక్తల్ మండలం మంతన్గౌడ్కు చెందిన రైతు కురుమూర్తి (42) తన వ్యవసాయ పొలంలో పిడుగుపాటుకు గురై మృతి చెందాడు.