నిర్మల్, నమస్తే తెలంగాణ : నిర్మల్ జిల్లాలో యూరియా కొరత ఏర్పడింది. ప్రస్తుతం సాగు చేస్తున్న వరి, మక్క పంటలకు అవసరమైన యూరియా కోసం రైతులు ఎగబడుతున్నారు. శనివారం నిర్మల్ జిల్లా కుంటాలలో పోలీసు పహారా మధ్య యూరియా పంపిణీ చేయడం సర్కారు నిర్లక్ష్యాన్ని ఎత్తి చూపుతున్నది. పీఏసీఎస్ గోదాం వద్దకు రెండు యూరియా లారీలు వచ్చినట్టు తెలుసుకున్న నాలుగు గ్రామాల రైతులు దాదాపు 40 మందికిపైగా తరలి వచ్చారు.
వారిని అదుపు చేసేందుకు ముందు జాగ్రత్తగా పోలీసులను రంగంలోకి దించాల్సి వచ్చింది. పోలీసు పహారా మధ్యనే యూరియా పంపిణీ చేశారు. రైతుల సమస్యలను పరిష్కరిస్తామని అధికారంలోకి వచ్చిన కాంగ్రెస్ ప్రభుత్వం యూరియా విషయంలో ఎందుకు నిర్లక్ష్యం వహిస్తున్నదంటూ ప్రశ్నించారు. ఇప్పటికైనా యూరియా కొరత లేకుండా చూడాలని, లేనిపక్షంలో ఆందోళనకు దిగుతామని రైతులు హెచ్చరిస్తున్నారు.