చిన్నంబావి, జూలై 9: ‘సారూ.. మాకు పాఠాలు బోధించేందుకు సరిపోను స్టాఫ్ లేదు. మా పాఠశాలకు ఉపాధ్యాయులు కావాలి’ అంటూ విద్యార్థులు ఆవేదన వ్యక్తంచేశారు. వనపర్తి జిల్లా చిన్నంబావి మండలం అయ్యవారిపల్లి ప్రభుత్వ ఉన్నత పాఠశాలకు తాళం వేసి విద్యార్థులతోపాటు వారి తల్లిదండ్రులు మంగళవారం మండల కేంద్రానికి వచ్చి వాల్మీకి చౌరస్తాలో ధర్నా చేపట్టారు. ఈ సందర్భంగా విద్యార్థులు, వారి తల్లిదండ్రులు మాట్లాడుతూ.. పాఠశాలకు ఉపాధ్యాయులను వెంటనే నియమించాలని కోరారు. పాఠశాలలో 69 మంది విద్యార్థులకుగాను ఒక ప్రధానోపాధ్యాయుడు, ఒక వ్యాయామ టీచర్ మాత్రమే విధులు నిర్వర్తిస్తున్నారని, దీంతో విద్యార్థులు ఇబ్బందులు పడుతున్నారని వారి తల్లిదండ్రులు ఆగ్రహం వ్యక్తంచేశారు. గత విద్యా సంవత్సరంలో హిందీ, ఇంగ్లిష్, సోషల్ సబ్జెక్టులకు ఉపాధ్యాయులు లేకున్నా వలంటీర్లతో తరగతులు నెట్టుకొచ్చారని తెలిపారు. ఈ విద్యా సంవత్సరం విద్యార్థుల సంఖ్యకు అనుగుణంగా కనీసం ఆరుగురు టీచర్లు అవసరం ఉన్నదని, ఈ విషయాన్ని పలుమార్ల విద్యాశాఖ అధికారుల దృష్టికి తీసుకెళ్లినా ఫలితం లేదని వాపోయారు.