రాజన్న సిరిసిల్ల, జూలై 19 (నమస్తే తెలంగాణ): ఉపాధి లేక నేతన్నలు ఆత్మహత్యలు, ఆకలి చావులకు పాల్పడుతున్నా ప్రభుత్వం నిర్లక్ష్యంగా వ్యవహరిస్తున్నదని కార్మిక సంఘాల నాయకులు ధ్వజమెత్తారు. ప్రభుత్వ విధానాల వల్లే సిరిసిల్ల వస్త్రపరిశ్రమ తీవ్ర సంక్షోభంలోకి కూరుకుపోయిందని ఆందోళన వ్యక్తం చేశారు. సమస్యను పరిష్కరించే వరకు పోరాటం చేస్తామని స్పష్టం చేశారు. లేని పక్షంలో సోమవారం నుంచి ఆందోళన కార్యక్రమాలను ఉధృతం చేస్తామని హెచ్చరించారు. సిరిసిల్ల పట్టణంలోని నెహ్రూనగర్ అంబభవానీ సమావేశ మందిరంలో శుక్రవారం తెలంగాణ పవర్లూం వర్కర్స్ యూనియన్ ఆధ్వర్యంలో ఆసాములు, కార్మికులతో సమావేశం నిర్వహించారు. ఆసంఘం రాష్ట్ర అధ్యక్షుడు మూషం రమేశ్ హాజరై, మాట్లాడారు. వస్త్ర పరిశ్రమ సక్రమంగా నడవక మరమగ్గాలు మూతపడ్డాయని ఆందోళన వ్యక్తం చేశారు.
30వేల మంది కుటుంబాలకు ఉపాధి కల్పించడంలో ప్రభుత్వం పూర్తిగా విఫలమైందని మండిపడ్డారు.ఆర్థిక ఇబ్బందులతో పది మంది కార్మికులు ఆకలిచావులు, ఆత్మహత్యలకు పాల్పడినా సమస్య పరిష్కారానికి ఎలాంటి చర్యలు తీసుకోలేదని విమర్శించారు. మరమగ్గాలకు 10 హెచ్పీల వరకు ఉచిత కరెంటు ఇవ్వాలని, నాలుగో క్యాటగిరీ కింద విద్యుత్ సబ్సిడీ కొనసాగించాలని, పదికోట్ల మీటర్ల వస్త్ర ఆర్డర్లు ఇవ్వాలని, 2023 నుంచి కార్మికులకు రావాల్సిన సబ్సిడీ విడుదల చేయాలని డిమాండ్ చేశారు. వర్కర్టూ ఓనర్ పథకాన్ని అమలు చేసి, గత ప్రభుత్వం ప్రవేశపెట్టిన అన్ని సంక్షేమ పథకాలు యథావిధిగా కొనసాగించాలని తీర్మానించారు. ప్రభుత్వంపై ఒత్తిడి తెచ్చేందుకు సోమవారం నుంచి ఆందోళన కార్యక్రమాలను ఉధృతం చేస్తామని తెలిపారు.
అనంతరం వంటావార్పు, మంగళవారం రాస్తారోకో, బుధవారం సిరిసిల్ల పట్టణం బంద్, గురువారం చలో హైదరాబాద్ కార్యక్రమాలను నిర్వహించాలని సమావేశంలో నిర్ణయించారు. సమావేశంలో ఆసాముల సంఘం అధ్యక్షుడు సిరిసిల్ల రవి, నాయకులు చేరాల అశోక్, గోనే పర్శరాములు, పోరండ్ల రమేశ్, ప్రకాశ్రావు, దూస అశోక్, మండల రాజు, కొండ సుభాష్, చంద్రకాంత్, గోవిందు కనకయ్య, బూర శ్రీను, ఆడెపు కనకరాజు, సీఐటీయూ జిల్లా కార్యదర్శి కోడం రమణ పాల్గొన్నారు.