హనుమకొండ, జూలై 21: హనుమకొండ బాలసముద్రం పరిధిలోని అంబేద్కర్నగర్లో గల డబుల్ బెడ్రూం ఇండ్ల తాళాలు పగులగొట్టి పేదలు అక్రమంగా ప్రవేశించారు. ఆదివారం వారు ఇండ్లను శుభ్రం చేసుకున్నారు. తమకు ఇండ్లు కేటాయించే వరకు ఇక్కడి నుంచి వెళ్లేది లేదని పట్టుబట్టారు. విషయం తెలుసుకున్న సుబేదారి పోలీసులు గుడిసెవాసులకు సర్దిచెప్పే ప్రయత్నం చేసినా వినలేదు. వారిని ఇండ్ల నుంచి బయటకు పంపించడంతో అక్కడే వర్షంలోనే బైఠాయించారు. ఇండ్లు నిర్మించి ఐదేండ్లు అవుతున్నా లబ్ధిదారులకు ఎందుకు ఇవ్వడం లేదని ప్రశ్నించారు. కాంగ్రెస్ పార్టీ అధికారంలోకి ఏడు నెలలు గడిచినా ఇప్పటివరకు ఇండ్లు పంపిణీ చేయడం లేదని ఆగ్రహం వ్యక్తం చేశారు. హనుమకొండ తహసీల్దార్ అక్కడికి చేరుకొని విషయాన్ని కలెక్టర్ దృష్టికి తీసుకెళ్లి పరిష్కరించేందుకు కృషి చేస్తామని హామీ ఇవ్వడంతో ఆందోళన విరమించారు.