HomeTelanganaThe Police Are Standing By The Eye Of The Congress Leader Against The Trespasser In Arekars Farm
ఆరెకరాల పొలంపై కాంగ్రెస్ నేత కన్ను
తప్పు చేసేవారి పట్ల సింహస్వప్నంగా ఉండాల్సిన పోలీసులు.. అక్రమార్కులకే వత్తాసు పలుకుతున్నారని ఆరోపణలు వెల్లువెత్తుతున్నాయి.
రైతు వద్ద కోర్టు కాపీ ఉన్నా పట్టని అధికారులు
పోలీసుల సమక్షంలో ట్రాక్టర్తో పొలం చదును
అక్రమార్కుడికి అండగా నిలుస్తున్న పోలీసులు
కేటీదొడ్డి ఘటనపై సోషల్ మీడియాలో వైరల్
గద్వాల అర్బన్, జూలై 5: తప్పు చేసేవారి పట్ల సింహస్వప్నంగా ఉండాల్సిన పోలీసులు.. అక్రమార్కులకే వత్తాసు పలుకుతున్నారని ఆరోపణలు వెల్లువెత్తుతున్నాయి. ఈ ఘటన జోగుళాంబ గద్వాల జిల్లాలో శుక్రవారం వెలుగులోకి వచ్చింది. కేటీదొడ్డి మండల కేంద్రానికి చెందిన ఓ వ్యక్తి పేరిట ఆరెకరాలు భూమి ఉంది. ఆ భూమిపై కొందరు కాంగ్రెస్ నాయకుల కన్ను పడింది. సదరు రైతు పోలీసులను ఆశ్రయిస్తే.. ప్రయోజనం లేకుండా పోయింది.
రికార్డులో తన పేరే ఉన్నా.. పట్టాదారు పాస్ బుక్ ఉన్నా.. అధికారులు పట్టించుకోవడం లేదని వాపోయాడు. దీంతో బాధితుడు 2024లో కోర్టును ఆశ్రయించి (ఓఎస్ నెంబర్ 144) ఇంజక్షన్ ఆర్డర్ కాపీ పొందాడు. సదరు కాపీని పీఎస్లో చూపిస్తే.. ఇవేమీ చెల్లవంటూ కాంగ్రెస్ నేతకే వత్తాసు పలికారు. సదరు కాంగ్రెస్ నాయకుడు రైతు పొలంలో పోలీసుల సమక్షంలోనే ట్రాక్టర్తో దున్నించాడు. ఈ వ్యవహారాన్ని కొందరు సెల్ఫోన్లో చిత్రీకరించి సోషల్ మీడియాలో పోస్టు చేయడంతో వైరల్గా మారింది. డీఎస్పీ సత్యనారాయణను వివరణ కోరగా.. ఈ ఘటనపై పూర్తి స్థాయిలో విచారణ జరిపిస్తామని తెలిపారు.