హైదరాబాద్, మే 7(నమస్తే తెలంగాణ): మావోయిస్టు సానుభూతి పరుల నుంచి భద్రాద్రి కొత్తగూడెం జిల్లా చర్లలో నిరుడు ఆగస్టులో డ్రోన్లు, పేలుడు పదార్థాలు స్వాధీనం చేసుకొన్న కేసులో మరో ముగ్గురిపై జాతీయ దర్యాప్తు సంస్థ సోమవారం చార్జీషీటు దాఖలు చేసింది. గతంలో ఇదే కేసులో ఎనిమిది మందిపై చార్జీషీట్ ఫైల్ అయ్యింది.
భద్రతా బలగాలపై నిఘా ఉంచేందుకు డ్రోన్లు, అడ్డుకొనేందుకు ఆయుధాలు సప్లయ్ చేస్తన్నారని కమల, పరారీలో ఉన్న హిడ్మా, బడే చొక్కారావు అలియాస్ దామోదర్పై ఎన్ఐఏ అభియోగాలు మోపింది. వారిపై ఐపీసీ సెక్షన్ 120 బీ, యూఏ(పీ) చట్టంలోని 17, 18, 20, 38, 39, 40 సెక్షన్ల కింద, పేలుడు పదార్థాల చట్టంలోని సెక్షన్ 4 కింద చార్జీషీట్ దాఖలు చేశారు.