BRS | హైదరాబాద్, మే 10 (నమస్తే తెలంగాణ): లోక్సభ ఎన్నికల్లో రాష్ట్రంలోని మైనార్టీలు ఏ పార్టీకి ఓటు వేయాలన్న విషయమై ఏకపక్షం గా నిర్ణయం తీసుకున్నట్టు తెలుస్తున్నది. దేశవ్యాప్తంగా బీజేపీని అడ్డుకునే శక్తి కాంగ్రెస్కు లేదని తీర్మానించుకున్నట్టు సమాచారం. అన్నదమ్ముళ్లలా సామరస్యంతో సహజీవనం సాగిస్తున్న ప్రజలను ‘ఓటు’వర్గాలుగా విభజించి విద్వేష రాజకీయాలు చేస్తున్న బీజేపీని కట్టడి చేయడం కాంగ్రెస్తో సాధ్యం కావడం లేదని నిర్ధారించుకున్న మైనార్టీలు బలమైన లౌకికవాద పునాది, ఆచరణ ఉన్న బీఆర్ఎస్ వంటి పార్టీలకు అండగా ఉండాలని నిశ్చయించుకున్నట్టు వార్తలు వినిపిస్తున్నాయి.
కాంగ్రెస్ జాతీ య పార్టీగా కాకుండా పెద్దసైజ్ ప్రాంతీయ పార్టీగా రూపాంతరం చెందిందని, ఫలితంగా ఆ పార్టీని అంటిపెట్టుకొని ఉంటే తమకు శాశ్వతంగా ముప్పు వాటిల్లే ప్రమాదం ఉందని మై నార్టీల పెద్దలు నిర్ధారణకు వచ్చారని, రాష్ట్రం లో బీఆర్ఎస్కు జై కొట్టాలని నిర్ణయం తీసుకున్నారని విశ్వసనీయవర్గాల సమాచారం. వారి సమూహ సమావేశాల్లో ‘విధాన’ సంకేతాలు పంపినట్టు చెప్తున్నారు. ఈ పరిణామా న్ని అందిపుచ్చుకొనేందుకు రాష్ట్రంలో మైనార్టీ వర్గాల ప్రభావం అత్యధికంగా ఉండే హైదరాబాద్, సికింద్రాబాద్, ఆదిలాబాద్, నిజామాబాద్, వరంగల్, చేవెళ్ల, మెదక్ మొదలైన పార్లమెంట్ నియోజకవర్గాల్లో బీఆర్ఎస్ సైతం విస్తృత కార్యాచరణను చేపట్టింది.
బీజేపీని కాంగ్రెస్ నిలువరించలేదని దేశవ్యాప్తంగా స్థిరమైన అభిప్రాయం నెలకొన్నద ని, దేశంలో మరోసారి ప్రాంతీయ పార్టీలు నిర్ణయాత్మక శక్తిగా కీలక పాత్ర పోషించనున్నాయనే సంకేతాలు ఉన్నాయని విశ్లేషకులు పే ర్కొంటున్నారు. బీఆర్ఎస్ అధినేత కేసీఆర్ ‘ఈసారి కేంద్రంలో సంకీర్ణ ప్రభుత్వం ఏర్పడబోతున్నది. అందులో బీఆర్ఎస్ కీలక పాత్ర పోషించనున్నది’ అని ఎలా వెల్లడిస్తారు? అని రాజకీయ విశ్లేషకులు ప్రశ్నిస్తున్నారు. కేసీఆర్ లాంటి నాయకుడు ‘గాలిలో కాల్పులు’ అన్నట్టుగా వ్యవహరించే వ్యక్తి కాదని, ఎంతో సుదీ ర్ఘ రాజకీయ అనుభవం ఉన్న ఆయన దాదాపు ప్రతి సభలో ఇదే విషయాన్ని పదేపదే పేర్కొనడంలో కచ్చితమైన ప్రాతిపదిక ఉంటుందని ఉదహరిస్తున్నారు. రాష్ట్రంలోని మైనార్టీలు కేసీఆర్కు అండగా ఉండాలని తీర్మానించుకున్న ట్టు భావిస్తున్నారు. మణిపూర్, కశ్మీర్, ఉత్తరప్రదేశ్, కేరళలో మైనార్టీలపై బీజేపీ ప్రదర్శిస్తున్న అక్కసును కాంగ్రెస్ నిలువరించడంలో విఫలమైందని వారు ఉదహరిస్తున్నారు.
పార్లమెంట్ ఎన్నికలు అయిపోగానే సీఎం రేవంత్రెడ్డి బీజేపీలో చేరతాడని నిజామాబాద్ ఎంపీ ధర్మపురి అర్వింద్ పదేపదే చెప్తున్నారు. వాటికి బలం చేకూర్చే విధంగా బీజేపీలో, కేంద్ర ప్రభుత్వంలో నం.2గా ఉన్న అమిత్షా సైతం దాదాపు అదే అర్థం వచ్చేలా చేస్తున్న వ్యాఖ్యలను రేవంత్రెడ్డి సహా కాంగ్రెస్ నేతలెవరూ ఖండించకపోవడం మైనార్టీల్లో అనుమానాలను రేకెత్తించినట్టు తెలుస్తున్నది. ఇటీవల జగిత్యాలలో రేవంత్రెడ్డి బీజేపీ అభ్యర్థి అర్విం ద్ వ్యాఖ్యలకు దీటుగా సమాధానం చెప్పలేదని ఆ లోక్సభ పరిధిలోని ఓ మైనార్టీ నాయకుడు ఉదహరించారు. అసెంబ్లీ ఎన్నికల్లో అధికారంలోకి రావాలనే ఏకైక లక్ష్యంతో మైనార్టీలకు అలవికాని హామీలు ఇచ్చిన కాంగ్రెస్ ఆ తరువాత చేతులెత్తేసిందని ఆ వర్గం నేతలు విమర్శిస్తున్నారు. షబ్బీర్ అలీ లాంటి నాయకుడిని అసెంబ్లీ ఎన్నికల్లో ఇతర ప్రాంతానికి పంపి ఓడగొట్టడమే కాకుండా, కనీసం ఎమ్మెల్సీ కూడా ఇవ్వకపోవడంపై ఆ సామాజికవర్గం కాంగ్రెస్పై తీవ్ర ఆగ్రహంతో ఉన్నది. కాంగ్రెస్ తమ వర్గానికి సరైన ప్రాతినిధ్యం కల్పించాలని భావిస్తే ప్రజాబలం ఉన్న నాయకులకు కాకుండా హైదరాబాద్ లోక్సభ స్థానంలో ఇతరులకు టికెట్ ఎలా ఇస్తారని వారు గుర్రుగా ఉన్నారనే వాదనకు రోజురోజుకు బలం చేకూరుతుంది.
కేసీఆర్ ప్రభుత్వ హయాంలో రాష్ట్రంలో మైనార్టీలకు కలిగిన మేలు, ఐదునెలల కాలంలో కాంగ్రెస్ ప్రభుత్వం వేసిన అడుగులతో బేరీజు వేసుకున్న మైనార్టీలు ఏకపక్షంగా పార్లమెంట్ ఎన్నికల్లో బీఆర్ఎస్కు మద్దతు ఇవ్వాలని నిర్ణయం తీసుకున్నారని క్షేత్రస్థాయిలో చోటుచేసుకుంటున్న పరిణామాలు స్పష్టం చేస్తున్నాయి. అసెంబ్లీ ఎన్నికల నుంచి ప్రస్తుత పార్లమెంట్ ఎన్నికల దాకా జరిగిన ‘మార్పు’ను అంచనా వేసిన అనంతరమే మైనార్టీలు బీఆర్ఎస్కు జై కొట్టాలని తీర్మానించినట్టు విశ్వసనీయ వర్గాల సమాచారం. షాదీముబారక్, ఓవర్సీస్ స్కాలర్షిప్స్, మైనార్టీ గురుకుల విద్యాలయాల ఏర్పాటుతోపాటు బడ్జెట్లో మైనార్టీల అభివృద్ధి, సంక్షేమానికి బీఆర్ఎస్ సర్కార్ చూపిన దార్శనికతను గుర్తుచేసుకొని కేసీఆర్కు ‘తోఫా’ ఇచ్చేందుకు వారు సిద్ధమైనట్టు తెలుస్తున్నది. కేసీఆర్ నిర్వహిస్తున్న రోడ్షోలు, పార్టీ వర్కింగ్ ప్రెసిడెంట్ కేటీఆర్, మాజీ మంత్రి తన్నీరు హరీశ్రావు నిర్వహిస్తున్న సభలు, సమావేశాల్లో మైనార్టీల భాగస్వామ్యం పరిశీలకుల అంచనాలను నిజం చేస్తున్నది.