హైదరాబాద్, జూలై 25 (నమస్తే తెలంగాణ): రాష్ట్రంలో మరో రెండు రోజులు భారీ వర్షాలు కురుస్తాయని వాతావరణశాఖ తెలిపింది. రాష్ట్రంలో వారం రోజులుగా ఎడతెరిపినివ్వకుండా వానలు కురుస్తున్నాయి. దీంతో వాగులు పొంగి పొర్లుతుండగా, జలాశయాలు నిండుకుండలా మారాయి. ఉత్తర ఛత్తీస్గఢ్ వద్ద అల్పపీడనం ఏర్పడి, తూర్పు మధ్యప్రదేశ్ మీదుగా కొనసాగుతున్నట్టు అధికారులు వెల్లడించారు. ఈ ప్రభావం ఉత్తర తెలంగాణ జిల్లాలపై ఉంటుందని తెలిపారు.
ఆసిఫాబాద్, పెద్దపల్లి, జగిత్యాల, మంచిర్యాల, భూపాలపల్లి జిల్లాల్లో అత్యంత భారీ వర్షాలు కురుస్తాయని ఎల్లోఅలర్ట్ జారీ చేశారు. రాష్ట్రవ్యాప్తంగా జూన్ 1 నుంచి గురువారం వరకు సాధారణం కంటే 30 శాతం అధిక వర్షపాతం నమోదైనట్టు వాతావరణ శాఖ తెలిపింది. గురువారం వరకు 312.2 మి.మీ సాధారణ వర్షపాతం కురియాల్సి ఉండగా, ఇప్పటి వరకు 407.3 మి.మీ వర్షపాతం నమోదైంది. గత 24 గంటల్లో కుమ్రం భీం ఆసిఫాబాద్ జిల్లాలోని కౌటాల మండలంలో అత్యధికంగా 4.34 సెం.మీ వర్షపాతం నమోదైంది.