అలంపూర్, మే 28: ఓ దళారీ చేతిలో రైతులు మోసపోయిన ఘటన జోగుళాంబ గద్వాల జిల్లాలో చోటుచేసుకున్నది. అలంపూర్కు చెందిన రైతు విజయ్కుమారెడ్డి తన పొలంతోపాటు కౌలుకు తీసుకున్న భూమిలో నిరుడు 40 ఎకరాల్లో పత్తి సాగు చేశాడు. మార్కెట్లో ధరలు లేకపోవడంతో పత్తిని నిల్వ ఉంచాడు. విజయ్ వద్ద నాలుగు లారీల పత్తి ఉన్నదని తెలుసుకున్న మానవపాడు మండలం జల్లాపురానికి చెందిన వ్యాపారి సతీశ్ సదరు రైతును సంప్రదించాడు. క్వింటా ధర రూ.7,200 చొప్పున బేరం కుదుర్చుకున్నాడు. మార్కెట్లో పత్తిని విక్రయించిన వెంటనే చెల్లిస్తానని నమ్మబలికాడు. ఈనెల 22న లారీలో తెల్లబంగారాన్ని నింపి రైతుతో కలిసి కర్ణాటకలోని రాయిచూర్ మార్కెట్కు తరలించి విక్రయించి డబ్బు చెల్లించాడు. మరుసటి రోజు రెండో లారీలో పత్తిని నింపారు.
చీకటి పడటంతో తెల్లవారుజామునే వెళ్దామని వ్యాపారి చెప్పాడు. ఉదయం చూసే సరికి లారీ కనిపించలేదు. లారీ యజమాని, డ్రైవర్ ఇద్దరు కలిసి బళ్లారిలో పత్తి అమ్మినట్టు తెలుసుకున్న రైతు నాలుగు రోజుల తర్వాత వారిని నిలదీయగా.. వ్యాపారి సతీశ్ తనకు డబ్బులు బాకీ ఉన్నాడని, అందుకే పత్తిని అమ్మినట్టు చెప్పారు. ఈ మేరకు వ్యాపారిపై పోలీసులకు ఫిర్యాదు చేశాడు. విచారణలో సదరు వ్యాపారి మరో ఇద్దరు రైతులను కూడా మోసం చేసినట్టు తేలింది. ముగ్గురు రైతులు 204 క్వింటాళ్ల పత్తిని విక్రయించి రూ.15 లక్షల వరకు మోసపోయినట్టు సమాచారం. వ్యాపారిపై కేసు నమోదు చేస్తామని అలంపూర్ ఎస్సై నాగరాజు తెలిపారు.