Mission Bhagiratha | హైదరాబాద్, జూన్ 10 (నమస్తే తెలంగాణ): మిషన్ భగీరథ పథకంపై ప్రభుత్వం ఇంటింటి సర్వేను చేపట్టింది. గ్రామీణ ప్రాంతాల్లో సోమవారం నుంచి ప్రారంభమైన సర్వే క్షేత్రస్థాయిలో పది రోజులపాటు కొనసాగనున్నది. నాలుగైదు సంవత్సరాల క్రితమే బీఆర్ఎస్ ప్రభుత్వం మిషన్ భగీరథ ద్వారా ఇంటింటికి నల్లా కనెక్షన్ ఇచ్చింది. బీఆర్ఎస్ ప్రభు త్వ హయాంలో పట్టణాల నుంచి పల్లెలకు వలసలు పెరిగాయి. పల్లెలో కొత్త కాలనీలు, పెద్దఎత్తున ఇండ్ల నిర్మాణాలు జరిగాయి. వాటన్నంటికీ నల్లా కనెక్షన్లు ఇవ్వాలనే డిమాండ్ పెరిగింది.
కొన్నింటికి కనెక్షన్ ఇచ్చినా.. ఇంకా మిగిలి ఉన్నాయా? అనే సమాచారాన్ని సేకరించడం, ఇంటి యజమాని వివరాలు సమగ్రంగా సేకరించడానికి సర్వేను ఉపయోగిస్తున్నారు. ఎన్ని రోజులకు ఒకసారి నల్లా వస్తున్నది.. ఎన్ని నీళ్లు వస్తున్నాయి ? తదితర సమాచారాన్ని సేకరిస్తున్నారు. దీంతోపాటు యజమాని ఆధార్, ఫోన్ నంబర్, ఇంటి ఫొటో, నల్లా సంపు ఫొటోను సర్వే సందర్భంగా యాప్లో అప్లోడ్ చేస్తున్నారు. ఈ సర్వేను అంగన్వాడీలు, కార్యదర్శులు, ఫీల్డ్ అసిస్టెం ట్ల ద్వారా చేయిస్తున్నారు. రోజుకు 30-50 ఇండ్ల వరకు సర్వే చేయాలని లక్ష్యంగా నిర్ణయించారు. అన్ని అవాసాల్లోనూ సర్వే చేస్తున్నారు.