వేమనపల్లి, మే 20: ఆర్ఎంపీ వైద్యం వికటించి బాలిక మృతి చెందిన ఘటన మంచిర్యాల జిల్లా నెన్నెల మండల కేంద్రంలో సోమవారం జరిగింది. పోలీసులు కథనం ప్రకారం.. మండల కేంద్రానికి చెందిన కొమ్మెర అంజన్న-భాగ్యలక్ష్మి దంపతుల కూతురు సాయిపల్లవి(11) ఇటీవల అమ్మమ్మ ఊరైన వేమనపల్లి మండలం కల్మలపేటకు వచ్చింది. ఆదివారం రాత్రి సాయిపల్లవికి ఛాతిలో నొప్పి రావడంతో నీల్వాయిలోని ఆర్ఎంపీ సంతోష్ వద్దకు కుటుంబీకులు తీసుకువెళ్లారు.
సాయిపల్లవికి ఆర్ఎంపీ ఇంజక్షన్ వేశాడు. కొంత సమయానికే పల్స్, బీపీ పడిపోయి నాలుక మందం కాగా, వెంటనే అంబులెన్స్లో చెన్నూరులోని ప్రభుత్వ దవాఖానకు తీసుకువెళ్లారు. మెరుగైన చికిత్స కోసం మంచిర్యాల ప్రభుత్వ దవాఖానకు తరలించారు. సాయిపల్లవి అక్కడ చికిత్స పొందుతూ సోమవారం ఉదయం మృ తి చెందింది. ఆర్ఎంపీ నిర్లక్ష్యంతోనే సాయిపల్లవి మృతి చెందిందని ఆమె తల్లి భాగ్యలక్ష్మి నీల్వాయి పోలీస్స్టేషన్లో ఫిర్యాదు చేసింది.