ఏటూరునాగారం, జూలై 14 : ములుగు జిల్లా ఏటూరునాగారం మండలం శంకరాజుపల్లి గ్రామానికి చెందిన గిరిజనులు(Tribals) వేసుకున్న గుడిసెలను(Demolished huts) ఆదివారం అటవీశాఖ అధికారులు(
Forest officials )కూల్చివేశారు. వివరాల్లోకి వెళ్తే.. శంకరాజుపల్లి గ్రామానికి చెందిన గిరిజనులు తమకు ప్రత్యేక గ్రామం ఏర్పాటు చేయాలని కొద్ది రోజులుగా అధికారులకు విన్నవించుకుంటున్నారు. ఈ క్రమంలో గ్రామానికి సమీపంలో ఉన్న ఖాళీ స్థలంలో గుడిసెలు వేసుకుని, వాటిపై టార్పాలిన్ షీట్లు కప్పుకొని నివసిస్తున్నారు.
కాగా, ఆదివారం సమారు 15 మంది అటవీ శాఖ అధికారులు గుడిసెల వద్దకు చేరుకొని, అందులో నివసిస్తున్న వారిని బయటకు పంపించడంతోపాటు ఇంట్లో ఉన్న సామగ్రిని బయట పడేశారని బాధితులు తెలిపారు. గుడిసెలకు కట్టుకున్న తాళ్లను గొడ్డళ్లతో నరికి, టార్పాలిన్ షీట్లను తొలగించి కొన్ని గుడిసెలను కూల్చి వేశారని ఆవేదన చెందారు. వెంటనే గుడిసెలను ఖాళీ చేయకుంటే రేపు వచ్చి డోజర్లతో కూల గొట్టిస్తామని హెచ్చరించినట్లు బాధితులు తాటి నీలాద్రి, అనుము సంపత్, జబ్బ సమ్మయ్య, గడ్డం కనకయ్య, తలండి సమ్మయ్య, తాటి వెంకటయ్య తెలిపారు. ప్రభుత్వం స్పందించి తమకు న్యాయం జరిగేలా చర్యలు తీసుకోవాలని గుడిసెల వాసులు వేడుకున్నారు.