ఖమ్మం, జూన్ 13 (నమస్తే తెలంగాణ ప్రతినిధి): ఏన్కూరు లింకు కాలువకు రాజీవ్ కెనాల్గా నామకరణం చేసినట్టు డిప్యూటీ సీఎం మల్లు భట్టి విక్రమార్క, సాగు నీటిపారుదల శాఖ మంత్రి ఉత్తమ్కుమార్రెడ్డి ప్రకటించారు. ఆగస్టు 15 నాటికి దానిని పూర్తి చేసి 1.20 లక్షల ఎకరాలకు గోదావరి నుంచి సాగునీటిని అందిస్తామని తెలిపారు. సీతారామ ఎత్తిపోతల పథకంలో 1, 2, 3వ ప్యాకేజీల పనులను త్వరలోనే పూర్తి చేస్తామని చెప్పారు.
మంత్రులు తుమ్మల నాగేశ్వరరావు, పొంగులేటి శ్రీనివాసరెడ్డితో కలిసి వారు భద్రాద్రి జిల్లాలో గురువారం పర్యటించారు. తొలుత అశ్వాపురం మండలం అమ్మగారిపల్లి వద్ద ఉన్న సీతారామ ప్రాజెక్టు హెడ్ రెగ్యులేటరీ పనులను పరిశీలించారు. తర్వాత ములకలపల్లి మండలం పూసుగూడెం వద్ద మూడో పంప్హౌస్ పురోగతి గురించి ఎంపీలు, ఎమ్మెల్యేలు, అధికారులతో కలిసి సమీక్షించారు. ఈ సందర్భంగా వారు మాట్లాడుతూ.. 9 కిలోమీటర్లు ఉన్న ఏన్కూరు లింక్ కెనాల్ను పూర్తి చేయడానికి రూ.72 కోట్లు మంజూరు చేశామని, సీతారామ పంపుహౌస్ల 1, 2, 3వ డిస్ట్రిబ్యూటరీ ప్యాకేజీ పనులు త్వరలోనే మొదలవుతాయని వెల్లడించారు.