హైదరాబాద్, జూన్ 21 (నమస్తే తెలంగాణ) : మైనింగ్ పేరుతో ఎమ్మెల్యే గూడెం మహిపాల్ రెడ్డి అక్రమాలకు పాల్పడ్డారని ఎన్ఫోర్స్మెంట్ డైరెక్టరేట్ సంచలన ఆరోపణలు చేసింది. సంగారెడ్డి జిల్లా పటాన్చెరులో ఉన్న ఎమ్మెల్యే, ఆయన తమ్ముడు మధుసూదన్రెడ్డి ఇండ్లు, ఆఫీసులపై మనీలాండరింగ్, హవాలా అనుమానాల నేపథ్యంలో ఈడీ సోదాలు జరిపిన విషయం విదితమే. మైనింగ్ పేరుతో రూ.300 కోట్లమేర అక్రమాలు జరిగాయని, ప్రభుత్వానికి రూ.39 కోట్లు నష్టం చేకూర్చారని ఈడీ అధికారులు శుక్రవారం ఒక ప్రకటనలో పేర్కొన్నారు.
బ్యాంక్ అకౌంట్లలో అక్రమ లావాదేవీలను గుర్తించామని, అక్రమ మార్గంలో కూడబెట్టిన డబ్బుతో రియల్ ఎస్టేట్ రంగంలో పెట్టుబడులు పెట్టారని తెలిపారు. సోదాల సందర్భంగా రూ.19 లక్షల నగదు స్వాధీనం చేసుకున్నట్టు వెల్లడించారు. బినామీల పేర్లతో లావాదేవీలను గుర్తించామని, కొన్ని బ్యాంక్ లాకర్స్ని తెరవాల్సి ఉందని తెలిపింది. పెద్ద సంఖ్యలో ఆస్తి పత్రాలు, లెకల్లో చూపని నగదు స్వాధీనం చేసుకున్నట్లు పేర్కొన్నారు. నగదుకు సంబంధించిన ఆధారాలు ఉన్న మొబైల్ ఫోన్లను సీజ్ చేశామన్నారు.