కడ్తాల్, డిసెంబర్ 30: తెలంగాణలో జరుగుతున్న అభివృద్ధి, నిరుపేదల సంక్షేమానికి ప్రభుత్వం అమలు చేస్తున్న పథకాలు అద్భుతంగా ఉన్నాయని మాల్దీవ్స్ దేశానికి చెందిన ఎల్జీఏ (లోకల్ గవర్నింగ్ అథారిటీ) డైరెక్టర్ హవ్వా ఇజ్వాత్ కొనియాడారు. రాజేంద్రనగర్లో జాతీయ గ్రామీణాభివృద్ధి-పంచాయతీరాజ్ శాఖ ఆధ్వర్యంలో, స్థానిక ప్రజాప్రతినిధుల సామర్థ్యం పెంపు అనే అంశంపై నిర్వహించిన ప్రత్యేక అంతర్జాతీయ సదస్సు, శిక్షణ తరగతులకు మాల్దీవ్స్ దేశానికి చెందిన 20 మంది అటోల్ కౌన్సిలర్లు హాజరయ్యారు. శిక్షణ తరగతుల్లో భాగంగా శుక్రవారం రంగారెడ్డి జిల్లా కడ్తాల్ గ్రామ పంచాయతీని జాతీయ గ్రామీణాభివృద్ధి, పంచాయతీరాజ్ శాఖ అధికారులతో కలిసి సందర్శించారు. ఈ సందర్భంగా కడ్తాల్ గ్రామ పంచాయతీ కార్యాలయంలో సమావేశం ఏర్పాటు చేశారు. గ్రామ పంచాయతీల స్థితిగతులు, ఆదాయ వ్యయాలు, చేపట్టిన అభివృద్ధి పనులు, సంక్షేమ పథకాలకు గురించి వారికి సర్పంచ్ లక్ష్మీనర్సింహారెడ్డి వివరించారు. అనంతరం గ్రామంలో నిర్మించిన పల్లెప్రకృతి వనం, రైతు వేదిక, వైకుంఠధామం, నర్సరీ, సీసీ రోడ్లు, అండర్గ్రౌండ్ డ్రైనేజీ వ్యవస్థ, ఎల్ఈడీ లైట్లు, మంచినీటి సరఫరా తీరును పరిశీలించారు.
సాగుకు ప్రోత్సాహం భేష్
తెలంగాణలో అమలవుతున్న పథకాలు అద్భుతంగా ఉన్నాయని ఈ సందర్భంగా మాల్దీవ్స్ ఎల్జీఏ డైరెక్టర్ హవ్వా ఇజ్వాత్ ప్రశంసించారు. వ్యవసాయరంగానికి ప్రభు త్వం అమలు చేస్తున్న రైతుబంధు, రైతుబీమా, ఉచిత విద్యుత్తు పథకాలు అత్యద్భుతమని కొనియాడారు. మహిళా సాధికారత కు ప్రభుత్వం చేయూతనందించడం బాగుందని కితాబిచ్చారు. తెలంగాణలో అమలవుతున్న పథకాలు తమ దేశంలో అమలు చేసేందుకు చర్యలు తీసుకుంటామని వివరించారు. కార్యక్రమంలో ఎన్ఐఆర్డీ అధికారులు అంజన్కుమార్ భోంజియా, తఖీయుద్దీన్, మాల్దీవులు ప్రజాప్రతినిధులు మూస షఫీఖ్, మహ్మద్ సిరాజ్, అమీన్ మహ్మద్, మహ్మద్ షియామ్, ఆతీఫ్ హుస్సేన్, అహ్మద్ అస్లం, అలీ సజీర్, అహ్మద్ రైసమ్, మహ్మద్ బషీర్, అహ్మద్ ఆఫ్రా, అబ్దుల్లా షహుజా, హుస్సేన్ ఆరుసలాన్, అహ్మద్ అబ్దుల్ షకూర్, మహ్మద్ నీమాల్, అబ్దుల్లా వాహిద్, అబ్దుల్లా షరీఫ్, అబ్దుల్లా ఫహాతా, ఇస్మాయిల్ అలీ, ఇబ్రహీం షరీఫ్ తౌఫీక్, మిఫ్తాహ్ మజీద్, గ్రామపంచాయతీ సిబ్బంది పాల్గొన్నారు.