Congress Govt | హైదరాబాద్, జూన్ 13 (నమస్తే తెలంగాణ): ఆరు గ్యారెంటీలను ఎలా అమలు చేయాలన్న అంశంపై రాష్ట్ర ప్రభుత్వం తర్జనభర్జన పడుతున్నది. ఆగస్టు 15లోగా రూ.2 లక్షల రైతు రుణమాఫీ చేయడానికి రెండు నెలల గడువే మిగిలింది. రుణమాఫీ కోసం రూ.30 వేల కోట్లకుపైగా నిధులు అవసరమని అంచనా. ఈలోగా నిధుల సమీకరణ పెను సవాలుగా మారింది. రుణమాఫీతోపాటు ఇతర హామీల అమలుకు అవసరమైన నిధులను సమీకరించడానికి ఆదాయ మార్గాలను ప్రభుత్వం అన్వేషిస్తున్నది. ఈ మేరకు ఇప్పటికే ఆయా శాఖల అధికారులకు ఆదేశాలు వెళ్లాయి. ఈ నేపథ్యంలో ఆయా శాఖల మంత్రులు, కార్యదర్శులు, శాఖాధిపతులతో డిప్యూటీ సీఎం, ఆర్థిక శాఖ మంత్రి మల్లు భట్టి విక్రమార్క సమావేశం కానున్నారు. ఈ నెల 18 నుంచి శాఖలవారీగా బడ్జెట్ ప్రతిపాదనలపై చర్చించనున్నారు. కేంద్ర బడ్జెట్ ప్రవేశపెట్టిన తర్వాత, రాష్ట్ర అసెంబ్లీలో 2024-25 ఆర్థిక సంవత్సరానికి సంబంధించిన పూర్తిస్థాయి బడ్జెట్ను జూలై రెండో వారం లేదా మూడో వారంలో ప్రవేశ పెట్టడం కోసం ఆర్థిక శాఖ కసరత్తు చేస్తున్నట్టు సమాచారం.