హైదరాబాద్, జూలై 11 (నమస్తే తెలంగాణ): రాష్ట్రంలో సర్కారు దవాఖానల పరిస్థితి రోజురోజుకూ దయనీయంగా మారుతున్నది. ఇప్పటికే అనేక సమస్యలతో కొట్టుమిట్టాడుతున్న ప్రజావైద్యంపై ‘మందుల కొరత’ పిడుగులా మారింది. వైద్యారోగ్యశాఖ ఔషధాల కొనుగోలును పట్టించుకోకపోవటంతో క్రమంగా ‘సెంట్రల్ మెడిసిన్ స్టోర్లు’ (సీఎంఎస్)లు ఖాళీ అవుతున్నాయని విశ్వసనీయ వర్గాలు తెలిపాయి.
జలుబు, దగ్గు, వాపు వంటి ప్రాథమిక వ్యాధులకు కూడా మందులు లేకపోవటం వైద్యారోగ్యశాఖ దీనస్థితికి అద్దం పడుతున్నది. సీఎంఎస్లు మందులను నిల్వచేసే గోదాములు. ఇక్కడి నుంచి వాటి పరిధిలోని దవాఖానలకు మందులు సరఫరా అవుతుంటాయి. రాష్ట్రంలోని 11 సీఎంఎస్లు వరంగల్, కరీంనగర్, ఖమ్మం, నల్లగొండ, హైదరాబాద్, మెదక్, మహబూబ్నగర్, రంగారెడ్డి, సిద్దిపేట, ఆదిలాబాద్, నిజామాబాద్లో మందుల నిల్వలు తాజాగా పరిశీలించగా విస్తుపోయే అంశాలు వెల్లడయ్యాయి.
రాష్ట్రంలో సీజనల్ వ్యాధులు విజృంభిస్తున్నాయి. ఇలాంటి సమయంలో మందులు నిల్వ ఉంచుకోవాల్సింది పోయి ఖాళీ కావడంపై ఆందోళన వ్యక్తం అవుతున్నది. రాష్ట్ర ప్రభుత్వం పెండింగ్ బిల్లులు చెల్లించకపోవటంతో రెండు, మూడు నెలల కిందటే సప్లయర్లు మందుల సరఫరాను నిలిపివేశారు. అదేంటని అడిగితే.. కేంద్రం ఎన్హెచ్ఎం నిధులు మంజూరు చేయలేదని, అందుకే మందులు కొనటం లేదని వింత సమాధానం ఇచ్చింది. అయితే ప్రతి దవాఖానలో కచ్చితంగా మూడు నెలలకు సరిపడా మందులు ఉండాలని గతంలో బీఆర్ఎస్ ప్రభుత్వం స్పష్టమైన ఆదేశాలు ఇచ్చింది.
ఈ మేరకు అన్ని దవాఖానల్లో మూడు నెలలకు సరిపడా నిల్వలు ఉంచుతున్నారు. ప్రస్తుతం దవాఖానల్లో వాటితోనే నెట్టుకొస్తున్నారు. మరికొన్ని రోజుల్లో దవాఖానల్లో నిల్వలు అయిపోతాయని చెప్తున్నారు. అటు సీఎంఎస్ల్లో మందులు లేక, ఇటు దవాఖానల్లో మందులు లేకపోతే ప్రజావైద్యం సంక్షోభంలో చిక్కుకుంటుందని ఆందోళన వ్యక్తం చేస్తున్నారు. ఇప్పటికైనా ప్రభుత్వం స్పందించాలని కోరారు.