హైదరాబాద్, జూలై 19 (నమస్తే తెలంగాణ): నిరుద్యోగుల పోరాటాలకు ఎట్టకేలకు దిగొచ్చిన రాష్ట్ర ప్రభుత్వం గ్రూప్ 2 పరీక్షలను వాయిదా వేసింది. ఆగస్టు 7, 8 తేదీల్లో నిర్వహించనున్న ఈ పరీక్షలను డిసెంబర్ నెలలో నిర్వహిస్తామని ప్రకటించింది. త్వరలోనే కొత్త తేదీలను ప్రకటిస్తామని పేర్కొన్నది. తిరిగి డిసెంబర్లో ఈ పరీక్షలు నిర్వహిస్తామని టీజీపీఎస్సీ కార్యదర్శి నవీన్ నికోలస్ శుక్రవారం ఒక ప్రకటనలో తెలిపారు. రాష్ట్రంలోని 18 ప్రభుత్వ శాఖల్లో ఖాళీగా ఉన్న 783 గ్రూప్ 2 పోస్టుల భర్తీ కోసం 2022 డిసెంబర్ 29న ఆనాటి బీఆర్ఎస్ ప్రభుత్వ హయాంలో నోటిఫికేషన్ను విడుదల చేశారు. 5,51,943 మంది అభ్యర్థులు దరఖాస్తు చేసుకున్నారు. ఆనాడు వివిధ కారణాలతో పరీక్షలు జరగలేదు. గత అసెంబ్లీ ఎన్నికల తర్వాత ఈ ఏడాది ఆగస్టు 7, 8 తేదీల్లో నిర్వహించడానికి టీజీపీఎస్సీ అధికారులు పరీక్షల షెడ్యూల్ను ఖరారు చేశారు. అనంతరం నిరుద్యోగులు వివిధ పోటీ పరీక్షల విషయంలో అస్పష్టత, ప్రభుత్వ నిర్లక్ష్యంపై పెద్ద ఎత్తున ఆందోళనకు దిగారు. 10 ప్రధాన డిమాండ్లతో వివిధ రూపాల్లో ఉద్యమాలు నిర్వహించారు. వాటిలో గ్రూప్ 2 వాయిదాపైనే స్పష్టత ఇచ్చి, గ్రూప్ 2 పోస్టుల పెంపును పట్టించుకోకపోవడంపై నిరుద్యోగులు రగిలిపోతున్నారు.
గ్రూప్ 2 వాయిదాపై అంతకు ముందు రాష్ట్ర సచివాలయంలో గ్రూప్-2 అభ్యర్థులతో డిప్యూటీ సీఎం మల్లు భట్టి విక్రమార్క చర్చలు జరిపారు. నిరుద్యోగుల కోరిక మేరకు డిసెంబర్ చివరి వారానికి గ్రూప్-2 పరీక్ష వాయిదా అంశాన్ని పరిశీలించాలంటూ టీజీపీఎస్సీ చైర్మన్ మహేందర్రెడ్డికి ఫోన్లో సూచించారు. అనంతరం ఆయన మాట్లాడుతూ నిరుద్యోగులు చెప్పిన ప్రతి అంశాన్ని సీరియస్గా పరిశీలిస్తున్నట్టు తెలిపారు. ఉద్యోగాల కోసం ఉద్యమాలు చేస్తూ, బెదిరించి బ్లాక్మెయిల్ చేసి ఆ తర్వాత కేసుల పాలైతే మీరే నష్టపోతారని చర్చల సందర్భంగా నిరుద్యోగులను హెచ్చరించారు. కొందరు స్వలాభం కోసం చేస్తున్న ప్రయత్నాల్లో ఇబ్బందుల పాలు కావొద్దని కోరారు. మూడు నెలల్లోనే 54 వేల ఉద్యోగాలు కల్పించామని తెలిపారు. ఉద్యోగ ఖాళీలు వెతికి జాబ్ క్యాలెండర్ ప్రకటిస్తామని హామీ ఇచ్చారు. చర్చల్లో కాంగ్రెస్ ఎంపీలు మల్లు రవి, బలరాంనాయక్, అనిల్కుమార్ యాదవ్తోపాటు నిరుద్యోగుల ప్రతినిధులు లోకేశ్కుమార్ యాదవ్, సంజీవ్నాయక్, జనార్దన్ సహా మరో 50 మంది పాల్గొన్నారు.
చర్చల సందర్భంగా గ్రూప్ 1 అంశాన్ని పట్టించుకోలేదని నిరుద్యోగులు మండిపడుతున్నారు. ఆ విషయాన్ని లేవనెత్తితే భట్టి దానిని పక్కదోవ పట్టించే ప్రయత్నం చేశారని తెలిపారు. గ్రూప్ 2తోపాటు గ్రూప్ 3లో కూడా పోస్టుల సంఖ్యను తప్పక పెంచాలని, లేకుంటే ఉద్యమాలు కొనసాగుతూనే ఉంటాయని నిరుద్యోగులు స్పష్టం చేశారు. భట్టి విక్రమార్క జరిపిన చర్చలు సంతృప్తిగా లేవని నిరుద్యోగులు చెప్పారు. ఉద్యమాన్ని నీరుగార్చడం కోసమే కాంగ్రెస్ ప్రభుత్వానికి చెందిన కొందరు నిరుద్యోగులను విడగొడుతున్నారని, తమలో తమకే గొడువలు పెట్టే ప్రయత్నం చేస్తున్నారని ఆగ్రహం వ్యక్తం చేశారు.