TG Weather | తెలంగాణలో రెండురోజులు వర్షాలు కొనసాగే అవకాశం ఉందని హైదరాబాద్ వాతావరణ కేంద్రం హెచ్చరించింది. ఉత్తర ఛత్తీస్గఢ్ వద్ద అల్పపీడనం కేంద్రీకృతమైందని.. ప్రస్తుతం తూర్పు మధ్యప్రదేశ్ మీదుగా కొనసాగుతుందని.. దానికి అనుబంధంగా ఉపరితల ఆవర్తనం ఉందని తెలిపింది. ఆవర్తనం సగటున సముద్రమట్టం నుంచి 7.6 కిలోమీటర్ల వరకు విస్తరించి ఉందని.. ఎత్తుకు వెళ్లేకొద్దీ ఆగ్నేయ దిశగా వొంగి ఉందని పేర్కొంది.
తెలంగాణలో సోమవారం కుమ్రంభీం ఆసిఫాబాద్, మంచిర్యాల, జగిత్యాల, పెద్దపల్లి, శంకర్ భూపాలపల్లి జిల్లాల్లో అక్కడక్కడ భారీ వర్షాలు కురిసే అవకాశం ఉందని తెలిపింది. మంగళవారం నుంచి మరో రెండురోజుల వర్షాలు తేకలిపాటి నుంచి మోస్తరు వర్షం కురిసే అవకాశం ఉందని పేర్కొంది. ఇదిలా ఉండగా.. కామారెడ్డి, సంగారెడ్డి, రాజన్న సిరిసిల్ల, హన్మకొండ, ములుగు, జయశంకర్ జిల్లాల్లో భారీ వర్షాలు కురిశాయి. అలాగే, పలు జిల్లాలో మోస్తరు వర్షాపాతం నమోదైంది. అత్యధికంగా ములుగు జిల్లా మల్లంపల్లిలో 125.3 మిల్లీమీటర్లు, ఏటూరునాగారంలో 121.5 మిల్లీమీటర్ల వర్షాపాతం నమోదైంది.