హైదరాబాద్, మే 16 (నమస్తే తెలంగాణ): సైడ్ ఇవ్వలేదని ఆరోపిస్తూ ఆర్టీసీ బస్సుపై యాభై మంది యువకులు విధ్వంసం సృష్టించారు. ఈ ఘటన హైదరాబాద్ శివారు రాచులూర్ గేట్ వద్ద గురువారం చోటుచేసుకున్నది. కల్వకుర్తి డిపోకు చెందిన ఆర్టీసీ బస్సు ఎంతసేపు హారన్ కొట్టినా సైడ్ ఇవ్వట్లేదంటూ బస్సుని వెంబడించి, ఆపి మరి అద్దాలను ధ్వంసం చేశారు. దాడి ఘటనపై డ్రైవర్, కండక్టర్ ఫిర్యాదు మేరకు పోలీసులు కేసు నమోదు చేశారు. ఘటనాస్థలానికి చేరుకొని బస్సును పరిశీలించారు. డ్రైవర్, కండక్టర్ తమ ఫోన్లలో తీసిన ఫోటోలు, బైక్ నంబర్ల ఆధారంగా యువకుల కోసం పోలీసులు గాలిస్తున్నారు.