హైదరాబాద్, జూలై 11 (నమస్తే తెలంగాణ)/సిటీబ్యూరో: హైదరాబాద్ సౌత్ సర్కిల్లో విద్యుత్తు బిల్లుల వసూలును అదానీ గ్రూప్కు ఇస్తున్నట్టు వస్తున్న వార్తలపై తెలంగాణ స్టేట్ యునైటెడ్ ఎలక్ట్రిసిటీ ఎంప్లాయీస్ యూనియన్ భగ్గుమన్నది. సౌత్ సర్కిల్నేకాదు రాష్ట్రంలో ఏ ఒక్క సర్కిల్, ఫీడర్, కంపెనీలను ప్రైవేటు సంస్థలకు ఇవ్వొద్దని డిమాండ్ చేసింది. ఈ విధానాలను తక్షణమే విరమించుకోవాలని డిమాండ్ చేస్తూ గురువారం హైదరాబాద్ మింట్కాంపౌండ్లోని టీఎస్ఎస్పీడీసీఎల్ కార్పొరేట్ కార్యాలయం ఎదుట ధర్నా నిర్వహించింది. బిల్లుల వసూళ్లకు ప్రత్యేక డ్రైవ్ చేపట్టాలని ఆ సంఘం నాయకులు డిమాండ్ చేశారు. బిల్లులకు వెళ్లిన విద్యుత్తు ఉద్యోగులపై దాడులకు పాల్పడితే యాజమాన్యం రాజకీయ ఒత్తిళ్లకు లొంగకుండా చట్టప్రకారం చర్యలు తీసుకోవాలని కోరారు. సంస్థ డీపీఈ, విజిలెన్స్ను పూర్తిస్థాయిలో వినియోగించుకోవాలని సూచించారు.
అదానీతో దావోస్లోనే చీకటి ఒప్పందం జరిగిందని, వరల్డ్ ఎకనామిక్ ఫోరం సదస్సు వేదికగా తెలంగాణ కరెంట్పై గుత్తాధిపత్యాన్ని అదానీ చేతుల్లో పెట్టడానికి సీఎం రేవంత్రెడ్డి అంగీకరించారని యూనియన్ నేతలు ఆరోపించారు. అదానీతో సీఎం రేవంత్రెడ్డి చేసుకున్న ఒప్పందాలను బయటపెట్టాలని డిమాండ్ చేశారు. ఎస్పీడీసీఎల్, ఎన్పీడీసీఎల్, జెన్కో, ట్రాన్స్కో వంటి సంస్థలన్నీ ప్రజలు చెల్లించిన కరెంట్ బిల్లులతో సంపాదించిన ఆస్తులని తెలిపారు.
ఇదేమీ ప్రైవేటు ప్రాపర్టీ కాదనీ, దీనిపై చేసుకునే ఒప్పందం కూడా పబ్లిక్ డాక్యుమెంటేనని గుర్తుచేశారు. నాలుగు కోట్ల మంది ప్రజలకు చెందిన ఈ ఆస్తులను అదానీకో, అంబానీకో ఇస్తామని అంటే 55 వేల మంది విద్యుత్తు ఉద్యోగులు చూస్తూ ఊరుకోరని హెచ్చరించారు. అదానీకి కరెంట్ పంపిణీ వ్యవస్థను, బిల్లుల వసూలును అప్పగించి ఉద్యోగులను ఏం చేస్తారని ప్రశ్నించారు. ఉద్యోగులకు రక్షణ కల్పిస్తే ఎంత పెద్దవాళ్లకైనా, ఎంతటి పహిల్వాన్లకైనా నోటీసులు ఇచ్చి కరెంట్ సప్లయ్ ఆపేసే సత్తా తమకు ఉందని స్పష్టం చేశారు. సంస్థ ప్రయోజనాల కోసం, సంస్థను సంరక్షించుకునేందుకు తాము ఎల్లప్పుడూ సిద్ధంగా ఉంటామని పేర్కొన్నారు.
కేంద్ర ప్రభుత్వం తీసుకొచ్చిన విద్యుత్తు సవరణ బిల్లు-2022ను రద్దుచేయాలని డిమాండ్ చేశారు. అనంతరం తమ డిమాండ్లతో కూడిన వినతిపత్రాన్ని సంస్థ సీఎండీకి అందజేశారు. కార్యక్రమంలో సంఘం రాష్ట్ర అధ్యక్షుడు కే ఈశ్వర్రావు, ప్రధాన కార్యదర్శి వీ గోవర్ధన్, ప్రెసిడెంట్ కుమారచారి, వర్కింగ్ ప్రెసిడెంట్ ఎన్ స్వామి, ఉపాధ్యక్షులు వెంకట్నారాయణ, మధు, నాగేశ్వర్రావు, వెంటేశ్వర్రావు, కార్యదర్శులు సుధాకర్, రవీంద్రప్రసాద్ తదితరులు పాల్గొన్నారు.
అదానీ విషయంలో లోక్సభలో ప్రతిపక్ష నేత రాహుల్గాంధీ తన వైఖరిని ప్రకటించాలని బీఆర్ఎస్ వర్కింగ్ ప్రసిడెంట్ కే తారక రామారావు డిమాండ్ చేశారు. అదానీ విద్యుత్తు సంస్థల వ్యవహారంలో తెలంగాణ రాష్ట్ర ప్రభుత్వం అనుసరిస్తున్న అవకాశవాద, ద్వంద్వ వైఖరిపై రాహుల్గాంధీకి గురువారం ఎక్స్ వేదికగా కేటీఆర్ మరోసారి చురకలు అంటించారు. అదానీ విద్యుత్తుపై కాంగ్రెస్ పార్టీ వైఖరి అర్థం చేసుకోవడం కష్టమంటూ కేటీఆర్ ఎద్దేవా చేశారు. అదానీ విద్యుత్తు సంస్థకు వ్యతిరేకంగా మహారాష్ట్రలో నిరసన కార్యక్రమాలు చేపట్టిన కాంగ్రెస్ శ్రేణులు, మరో వైపు అదే అదానీ సంస్థకు స్వాగతం చెప్పడంపై అభ్యంతరం వ్యక్తం చేశారు.