హైదరాబాద్, జూన్20 (నమస్తే తెలంగాణ): నాగార్జునసాగర్ ప్రాజెక్టులో ప్రస్తుతం నిల్వ ఉన్న జలాల్లో తెలంగాణ కోటా సంబంధించిన 7.5టీఎంసీలు ఉన్నాయని, వాటిని ప్రస్తుత నీటిసంవత్సరానికి క్యారీ ఓవర్ చేయాలని తెలంగాణ ప్రభుత్వం డిమాండ్ చేస్తున్నది. ఈ మేరకు కృష్ణా రివర్ మేనేజ్మెంట్ బోర్డుకు తెలంగాణ సర్కారు తాజాగా లేఖను రాసింది.
బచావత్ ట్రిబ్యునల్ అవార్డు ప్రకారం ఒక నీటి సంవత్సరంలో వాడుకోలేని జలాలను తదుపరి నీటి సంవత్సరానికి బదిలీ చేయాలని ఉందని వెల్లడించింది. ఇదిలా ఉంటే క్యారీ ఓవర్ అంశంపై గతంలోనూ తెలంగాణ అనేక సార్లు విజ్ఞప్తి చేయగా, బోర్డు మాత్రం దానిని ఒకసారి అపెక్స్ కౌన్సిల్లో, మరోసారి ట్రిబ్యునల్లోనే తేల్చుకోవాలని చెబుతూ వస్తున్నది.