హైదరాబాద్, జూలై 9 (నమస్తే తెలంగాణ): సాంఘిక సంక్షేమ గురుకుల విద్యాసంస్థల్లో పనిచేస్తున్న సీనియర్ ఉపాధ్యాయులు మంగళవారం మెరుపు ధర్నాకు దిగారు. ఈ విద్యాసంస్థల్లో అవసరానికి మించి ఉపాధ్యాయులు పనిచేస్తున్నారనే కారణంతో సీనియర్ ఉపాధ్యాయులను అదనపు ఉపాధ్యాయులుగా గుర్తించి అర్ధరాత్రి హడావుడిగా బదిలీ చేసినందుకు నిరసనగా హైదరాబాద్ సేవాలాల్ బంజారాభవన్ వద్ద ఈ ఆందోళన చేపట్టారు. సొసైటీ కార్యదర్శి సీనియర్ ఉపాధ్వాయులను అదనపు ఉపాధ్యాయులుగా గుర్తించి హడావుడిగా బదిలీకి ఆదేశాలు ఇవ్వడాన్ని టీఎస్యూటీఎఫ్ తీవ్రంగా ఖండించింది.
రేషనలైజేషన్ నిబంధనల ప్రకారం అదనపు ఉపాధ్యాయులను బదిలీ చేయాల్సిన సందర్భంలో సీనియర్ల అంగీకారం తీసుకోవాలని టీఎస్యూటీఫ్ అధ్యక్షుడు జంగయ్య, ప్రధాన కార్యదర్శి రవి తెలిపారు. బలవంతంగా బదిలీ చేయాల్సి వస్తే జూనియర్లను మాత్రమే బదిలీ చేయాలని, రాత్రి సీనియర్ టీచర్లతో జాబితా విడుదల చేసి తెల్లారేసరికి కౌన్సెలింగ్కు రావాలని పిలవడం సమంజసం కాదని పేర్కొన్నారు. అదనపు ఉపాధ్యాయులను సర్దుబాటు చేసే సందర్భంలో రీ డిప్లాయ్మెంట్ నిబంధనలు పాటించి సీనియర్ ఉపాధ్యాయులకు న్యాయం చేయాలని డిమాండ్ చేశారు. జిల్లాల నుంచి వచ్చిన ఉపాధ్యాయులు తీవ్ర నిరసన తెలిపారు.