హైదరాబాద్, జూలై23 (నమస్తే తెలంగాణ): 2023-24 నీటి సంవత్సరానికి సంబంధించి తెలంగాణ వాటాలో 7.54 టీఎంసీల జలాలు నాగార్జునసాగర్ డ్యామ్లో మిగిలి ఉన్నాయని, వాటిని క్యారీ ఓవర్ చేసుకునే అవకాశమివ్వాలని కృష్ణా బోర్డును తెలంగాణ ప్రభుత్వం కోరింది. ఈ మేరకు కేఆర్ఎంబీ చైర్మన్కు రాష్ట్ర సాగునీటి పారుదలశాఖ ఈఎన్సీ అనిల్కుమార్ లేఖ రాశారు.
7.54 టీఎంసీలను ఈ నీటి సంవత్సరం వాటాలో లెక్కించవద్దని సూచించారు. బచావత్ ట్రిబ్యునల్ -1 అవార్డు 7 క్లాజ్ ప్రకారం తాగునీటికి వినియోగించుకునే జలాల్లో 20శాతం మాత్రమే పరిగణలోకి తీసుకోవాలని సూచించారు. ఆయా అంశాలపై ఇప్పటికే 17వ బోర్డు మీటింగ్లో చర్చించామని ఈఎన్సీ గుర్తుచేశారు.