Rave Party | హైదరాబాద్, జూలై 26 (నమస్తే తెలంగాణ): మీ పిల్లలు రేవ్ పార్టీలకు వెళ్తే మీరేం చేస్తున్నారు.. మత్తు పదార్థాలు వాడే అసాంఘిక కార్యక్రమాల్లో పాల్గొంటుంటే తల్లిదండ్రులుగా మీకు బాధ్యత లేదా? అని ఇటీవల రేవ్ పార్టీలో దొరికిన విద్యార్థుల తల్లిదండ్రులను రాష్ట్ర ఎక్సైజ్ ఎన్ఫోర్స్మెంట్ డైరెక్టర్ వీబీ కమలాసన్రెడ్డి నిలదీశారు.
గురువారం రేవ్పార్టీలో దొరికిన విద్యార్థులు, వారి తల్లిదండ్రులకు శుక్రవారం ఎక్సైజ్ భవన్లో కౌనెల్సింగ్ నిర్వహించారు. ఈ సందర్భంగా కమలాసన్రెడ్డి మాట్లాడుతూ లక్షలాది రూపాయలు వెచ్చించి కళాశాలల్లో ఉన్నత విద్యాభ్యాసం చేస్తున్న విద్యార్థులు రేవ్ పార్టీల్లో పాల్గొని మద్యం, డ్రగ్స్ తీసుకుంటూ, ఇతర అసాంఘిక కార్యక్రమాలకు పాల్పడుతుంటం సిగ్గుచేటని పేర్కొన్నారు.
మదాపూర్లోని క్లౌడ్ అపార్ట్మెంట్లో నిర్వహించిన రేవ్ పార్టీలో 20 మందికి పైగా విద్యార్థులు పట్టుబడటం విచారకరమని తెలిపారు. వీరిలో ఐదుగురిని జైలుకు పంపామని, విద్యార్థినుల జీవితాలు ఆగం కావొద్దనే ఈ కౌన్సెలింగ్ ఇస్తున్నామని, మరోసారి ఇలాంటివి జరిగితే కఠిన చర్యలు తీసుకుంటామని హెచ్చరించారు. కార్యక్రమంలో ఎక్సైజ్ ఈఎస్ఎస్టీఎఫ్ టీమ్ లీడర్ ప్రదీప్రావు, సిబ్బంది పాల్గొన్నారు. మిగతా వారికి ఈ నెల 30న కౌన్సెలింగ్ నిర్వహిస్తామని ప్రదీప్రావు తెలిపారు.