హైదరాబాద్, ఏప్రిల్ 21 (నమస్తే తెలంగాణ): వీధివ్యాపారులకు రుణాలు అందించటంలో దేశంలోనే తెలంగాణ ముందంజలో కొనసాగుతున్నది. మూడో విడతలోనూ రాష్ట్రమే ముందున్నది. ఇప్పటి వరకు మూడు విడతల్లో రూ.725 కోట్లను వీధివ్యాపారులకు రుణాల రూపంలో అందించారు. మొదటి విడతలో రూ.359 కోట్లు, రెండో విడతలో రూ.331 కోట్లు, మూడో విడతలో ఇప్పటి వరకు రూ.35 కోట్లను పంపిణి చేశారు. ప్రైవేటువ్యాపారులు, లోన్ యాప్లు, అధిక వడ్డీల బారిన పడకుండా ఉండాలనే ఉద్దేశంతో పట్టణప్రగతిలో భాగంగా వీధివ్యాపారులకు బ్యాంకుల ద్వారా రుణాలు అందిస్తున్నారు.
ఈ కార్యక్రమం 2020లో ప్రారంభించారు. రాష్ట్రంలో 6.22 లక్షలకుపైగా వ్యాపారులు ఉండగా, మొదటి విడతగా 3.59 లక్షల మందికి 10 వేల చొప్పున, ఆ మొత్తాన్ని చెల్లించిన వారికి రెండో విడతలో 20 వేలు చొప్పున, దానిని కూడా చెల్లిస్తే మూడో విడతలో 50 వేల రుణాన్ని అందిస్తున్నారు. అతి తక్కువ వడ్డీతో, డిజిటల్ చెల్లింపులను ప్రోత్సహించే విధంగా పలు ప్రోత్సాహకాలను ఇందులో అందిస్తున్నారు. మార్చి నెలాఖరు వరకు 3,870 మందికి రుణాలు ఇవ్వాలని లక్ష్యంగా నిర్ణయిస్తే లక్ష్యాన్ని మించి 6,858 మందికి రూ.35 కోట్లను అందించారు. ఏప్రిల్ నుంచి కొత్తగా లక్ష్యాన్ని నిర్ణయిస్తారని అధికారులు అంచనా వేస్తున్నారు. రుణాలు ఇవ్వడమే కాకుండా ప్రభుత్వ నిధులతో పెద్ద ఎత్తున వీధివ్యాపారులకు సముదాయాలను నిర్మిస్తున్నారు.