నీతి ఆయోగ్ మీటింగ్కు కేసీఆర్ వెళ్లకపోవడం తప్పు!
నీతి ఆయోగ్ మీటింగ్కు సీఎం కేసీఆర్ హాజరుకావాలి. ప్రజలు ఎదుర్కొంటున్న సమస్యలపై ప్రధానిని ప్రశ్నించేందుకు ఇది మంచి అవకాశం. ఈ అవకాశాన్ని వినియోగించుకునేందుకు కేసీఆర్ నీతి ఆయోగ్ మీటింగ్కు వెళ్తానంటే మేమే ప్రత్యేక విమానం ఏర్పాటు చేస్తం. ఈ మీటింగ్కు కేసీఆర్ హాజరుకాకుంటే ప్రధాని మోదీకి లొంగిపోయినట్టే!
-టీపీసీసీ అధ్యక్ష హోదాలో 2022, ఆగస్టు 7న రేవంత్రెడ్డి
నీతి ఆయోగ్ సమావేశాన్ని బహిష్కరిస్తున్నం
ఈ నెల 27న జరిగే నీతి ఆయోగ్ సమావేశాన్ని బహిష్కరిస్తున్నం. కేంద్రం తెలంగాణ హక్కులకు భంగం కలిగించింది. నిధుల కేటాయింపుల్లో రాష్ర్టానికి అన్యాయం చేసింది.
-2024, జూలై 24న సీఎం హోదాలో రేవంత్రెడ్డి
కేంద్ర ప్రభుత్వ వైఖరికి నిరసనగా నీతి ఆయోగ్ సమావేశాన్ని బహిష్కరిస్తున్నాం. మిషన్ కాకతీయ, మిషన్ భగీరథకు ప్రత్యేక గ్రాంట్ ఇవ్వాలని నీతి ఆయోగ్ చేసిన సిఫారసులను కేంద్రం పట్టించుకోనందుకు నిరసనగా ఈ నిర్ణయం తీసుకున్నం.
-2022, ఆగస్టు 6న సీఎం కేసీఆర్
CM Revanth Reddy | హైదరాబాద్, జూలై 24 (నమస్తే తెలంగాణ) : అనుభవంలోకి వస్తే తప్ప జ్ఞానం బోధపడదని అంటే ఇదేనేమో. తెలంగాణ పట్ల కేంద్రం అనుసరిస్తున్న పక్షపాత వైఖరికి నిరసనగా నీతి అయోగ్ సమావేశాన్ని బహిష్కరిస్తున్నట్టు అప్పట్లో సీఎం కేసీఆర్ ప్రకటిస్తే పీసీసీ అధ్యక్షునిగా ఉన్న ప్రస్తుత సీఎం రేవంత్రెడ్డి తప్పుపట్టారు. ప్రజలు ఎదుర్కొంటున్న సమస్యలపై ప్రధానిని నిలదీయడానికి నీతి అయోగ్ సమావేశం ఒక మంచి అవకాశమని వాదించారు. ఆ సమావేశానికి సీఎం కేసీఆర్ వెళ్లాలని డిమాండ్ చేశారు. అదే రేవంత్రెడ్డి ఇప్పుడు సీఎంగా కేంద్ర బడ్జెట్లో తెలంగాణకు జరిగిన అన్యాయానికి నిరసనగా నీతి అయోగ్ సమావేశాన్ని బహిష్కరిస్తున్నట్టు బుధవారం శాసనసభలో ప్రకటించారు. అంటే అప్పుడు సీఎం కేసీఆర్ తీసుకున్న నిర్ణయం కరక్టే అని ఇప్పటికైనా ఒప్పుకున్న ట్టే కదా? తెలంగాణపై కేంద్రంలో బీజేపీ సర్కార్ వివక్షను కేసీఆర్ ఎందుకు ఎండగట్టాల్సి వచ్చిందో ఇప్పటికైనా రేవంత్రెడ్డికి జ్ఞానోదయం అయిందని అనుకోవాలా? కేంద్రం వైఖరిపై అప్పుడు కేసీఆర్ ధర్మాగ్రహంలో న్యాయం ఉందని ఇప్పటికైనా రేవంత్రెడ్డి అంగీకరించినట్టేనా?
నీతి అయోగ్ సిఫారసులకు కేంద్రం విలువ ఇవ్వనప్పుడు ఆ సమావేశానికి వెళ్లడంలో అర్థం లేదనే బహిష్కరిస్తున్నట్టు రెండేండ్ల కిందట సీఎం కేసీఆర్ (ఆగస్టు 7, 2022)ప్రకటించారు. మిషన్ కాకతీయకు రూ.5 వేల కోట్ల గ్రాంట్, మిషన్ భగీరథకు రూ.19,500 కోట్ల గ్రాంట్ తెలంగాణకు ఇవ్వాలని నీతి అయోగ్ చేసిన సిఫారసును కేంద్రం పట్టించుకోకపోవడంతో.. నిరసనగా నీతిఆయోగ్ సమావేశాన్ని బహిష్కరిస్తున్నట్టు కేసీఆర్ వివరించారు. కేంద్రం వైఖరిని తప్పుపట్టాల్సిందిపోయి అప్పుడు పీసీసీ అధ్యక్షునిగా ఉన్న రేవంత్రెడ్డి సీఎం కేసీఆర్ నిర్ణయాన్నే తప్పుపట్టారు.