Pocharam Srinivas Reddy | హైదరాబాద్, జూన్ 21 (నమస్తే తెలంగాణ) : ఉమ్మడి నిజామాబాద్ జిల్లాకు చెందిన బీఆర్ఎస్ నాయకుడు, మాజీ స్పీకర్, ప్రస్తుత బాన్సువాడ ఎమ్మెల్యే పోచారం శ్రీనివాస్రెడ్డి, ఆయన కొడుకు భాస్కర్రెడ్డి శుక్రవారం కాంగ్రెస్లో చేరారు. సీఎం రేవంత్రెడ్డి, మంత్రి పొంగులేటి శ్రీనివాస్రెడ్డి శుక్రవారం ఉదయం హైదరాబాద్లోని పోచారం ఇంటికి వెళ్లి ఆహ్వానించి ఇద్దరికీ కాంగ్రెస్ కండువా కప్పారు. ఈ సందర్భంగా సీఎం రేవంత్రెడ్డి మాట్లాడుతూ తెలంగాణ పునర్నిర్మాణంలో భాగంగా పోచారం శ్రీనివాస్రెడ్డిని కలిశామని, తమ ప్రభుత్వానికి పెద్దలు అండగా ఉండాలని కోరిన వెంటనే ఆయన కాంగ్రెస్లో చేరారని తెలిపారు. రైతుల సంక్షేమంపై పోచారం నుంచి సలహాలు, సూచనలు తీసుకుంటామన్నారు. భవిష్యత్తులో పోచారం శ్రీనివాస్రెడ్డికి సముచిత గౌరవం కల్పిస్తామన్నారు. నిజామాబాద్ జిల్లాలో పెండింగ్ ప్రాజెక్టులను పూర్తి చేసేందుకు ఆయన సహకారం తీసుకుంటామన్నారు.
రైతు సంక్షేమం కోసం సీఎం రేవంత్రెడ్డి చేస్తున్న కృషి అభినందనీయమని, కాంగ్రెస్ ప్రభుత్వం అమలు చేస్తున్న వ్యవసాయ, రైతు విధానాలు నచ్చి కాంగ్రెస్లో చేరానని పోచారం శ్రీనివాస్రెడ్డి తెలిపారు. తన రాజకీయ ప్రస్థానం కాంగ్రెస్ నుంచే మొదలైందన్నారు.