BRS | హైదరాబాద్, సెప్టెంబర్ 22 (నమస్తే తెలంగాణ): చట్టసభల్లో మహిళలకు 33 శాతం రిజర్వేషన్ కోసం కేంద్రంపై ఒత్తిడి తెచ్చి సఫలీకృతమైన బీఆర్ఎస్ పార్టీ, అదే స్ఫూర్తితో బీసీ రిజర్వేషన్లపై కేంద్రంపై ఒత్తిడి తేవటానికి శ్రీకారం చుట్టిందా? అంటే జరుగుతున్న పరిణామాలు అవుననే అంటున్నాయి. మహిళలు, బీసీలకు రిజర్వేషన్లు కల్పించాలని బీఆర్ఎస్ ప్రభుత్వం తెలంగాణ రాష్ట్ర తొలి అసెంబ్లీ సమావేశాల్లోనే ఏకగ్రీవం తీర్మానం చేసి కేంద్రానికి పంపిన విషయం తెలిసిందే. సందర్భం వచ్చిన ప్రతీసారీ ఈ అంశాలపై పార్లమెంట్లో బీఆర్ఎస్ ఎంపీలు కేంద్రాన్ని నిలదీస్తూ వచ్చారు. దీనికితోడు ఈ నెల 15న బీఆర్ఎస్ అధినేత, సీఎం కేసీఆర్ అధ్యక్షతన జరిగిన పార్లమెంటరీ పార్టీ సమావేశంలో మహిళాబిల్లు, బీసీ రిజర్వేషన్లపై మరోసారి ఏకగ్రీవ తీర్మానం చేసింది. పార్లమెంట్ ప్రత్యేక సమావేశాల్లో ఈ బిల్లును ప్రవేశపెట్టి ఆమోదించేలా చర్యలు తీసుకోవాలని ప్రధాని మోదీకి సీఎం కేసీఆర్ లేఖ కూడా రాశారు.
దేశవ్యాప్తంగా నెలకొన్న రాజకీయ పరిణామాల నేపథ్యంలో మహిళా బిల్లును చేపట్టక కేంద్రానికి తప్పలేదు. ఈ బిల్లుకు ఎట్టకేలకు పార్లమెంటు ఆమోదం తెలిపింది. అయితే, ఎమ్మెల్సీ కల్వకుంట్ల కవిత మహిళా రిజర్వేషన్ బిల్లు కోసం పట్టుబట్టి దేశంలోని అన్ని రాజకీయ పార్టీల అధ్యక్షులు రాష్ర్టాల సీఎంలకు లేఖలు రాయటం వంటి పరిణామాలతో సఫలీకృతం అయ్యారు. రాజకీయ పరిణామాలు ఏవైనా బీఆర్ఎస్ పార్టీ చేసిన డిమాండ్ను పరిగణనలోకి తీసుకొని కేంద్రం మహిళా బిల్లును ఆమోదించక తప్పలేదు. ఈ నేపథ్యంలో బీసీ రిజర్వేషన్ బిల్లు కోసం కూడా కేంద్రంపై ఒత్తిడి తేవటానికి బీఆర్ఎస్ పార్టీ కార్యాచరణను సిద్ధం చేస్తున్నది. రాష్ట్ర ప్రభుత్వంలోని 19 రాష్ట్రస్థాయి కార్పొరేషన్లకు చెందిన బీసీ చైర్మన్లు బీసీ రిజర్వేషన్పై బుధవారం హరిత ప్లాజాలో రౌండ్ టేబుల్ సమావేశం నిర్వహించారు.
బీసీ రిజర్వేషన్ కోసం తెలంగాణతోపాటు మహారాష్ట్రలోనూ క్షేత్రస్థాయి ఉద్యమానికి బీఆర్ఎస్ పార్టీ కార్యాచరణ రూపొందిస్తున్నది. బీసీలు ఎక్కువగా ఉన్న మహారాష్ట్రలో బీసీ ఉద్యమ నిర్మాణానానికి కావలసిన అన్ని ఏర్పాట్లను బీఆర్ఎస్ మహారాష్ట్ర విభాగం సన్నద్ధం చేస్తున్నది. మహారాష్ట్ర రైతు జీవితాల్లో మార్పు తేవటానికి బీఆర్ఎస్ పార్టీ ఇచ్చిన ‘అబ్ కీ బార్ కిసాన్ సర్కార్’ నినాదం ఆ రాష్ట్ర రైతాంగంలోకి బలంగా చొచ్చుకొని పోయింది. మహారాష్ట్రలో తెలంగాణ మాడల్ అమలు కోసం ప్రజల నుంచి వస్తున్న ఆదరణతోపాటు కొన్ని ప్రాంతాల్లో బీసీ ఉద్యమానికి నాయకత్వం వహించాలన్న డిమాండ్ అక్కడి బీఆర్ఎస్ నేతలకు వస్తుంది. ఈ పరిణామాల నేపథ్యంలో బీసీ రిజర్వేషన్ కోసం ఏకకాలంలో అటు మహారాష్ట్ర, ఇటు తెలంగాణలోనూ చేపట్టాలని బీఆర్ఎస్ భావిస్తున్నట్టు విశ్వసనీయవర్గాల సమాచారం.
బీసీ కులగణన జరగాలని, బీసీ రిజర్వేషన్లు పెంచాలని, కేంద్రంలో బీసీ మంత్రిత్వశాఖ ఏర్పాటు చేయాలని బీఆర్ఎస్ ఎప్పటి నుంచో డిమాండ్ చేస్తున్నది. ఇందుకోసం రాష్ట్ర అసెంబ్లీ ఏకగీవ్ర తీర్మానాలు చేసి కేంద్రానికి పంపింది. మరోవైపు బీసీ సాధికారత కోసం రాష్ట్ర ప్రభుత్వం అనేక చర్యలు తీసుకున్నది. బీసీ జనోద్ధరణ కోసం గొర్ల పంపిణీ, ఉచిత చేప పిల్లల పంపిణీ, నాయీబ్రాహ్మణులు, రజకులకు 250 యూనిట్ల వరకు ఉచిత విద్యుత్తు, ఆధునిక దోబీఘాట్ల నిర్మాణం, బీసీ కులవృత్తిదారులకు రూ.1లక్ష ఆర్థిక సాయం వంటి వినూత్న కార్యక్రమాలు చేపట్టి దేశం దృష్టిని ఆకర్షించింది. బీసీల అభ్యున్నతి కోసం గడచిన తొమ్మిదిన్నరేండ్లుగా చేపట్టిన అభివృద్ధి, సంక్షేమ పథకాలు దేశానికే ఆదర్శంగా నిలిచాయి. బీసీల్లోని అన్ని కులాలకు కోట్ల రూపాయల విలువైన భూములు కేటాయించి ఆత్మగౌరవ భవనాలు నిర్మిస్తున్నది. విప్లవాత్మక పథకాలతో బీసీలను అక్కున చేర్చుకున్న ప్రభుత్వంగా బీఆర్ఎస్కు జాతీయ స్థాయిలో ప్రత్యేక గుర్తింపు లభించింది. ఇన్ని చేసిన ప్రభుత్వం చట్టసభల్లో తమకు రిజర్వేషన్ కల్పించేందుకు ముందు ఉంటుందని ఆ వర్గాలు భావిస్తున్నాయి. ఈ నేపథ్యంలోనే బీసీ రిజర్వేషన్ బిల్లు కోసం కేంద్రంపై ఒత్తిడి తెచ్చేందుకు బీఆర్ఎస్సే సరైన వేదిక అని పలు బీసీ ఉద్యమ, ప్రజాసంఘాలు విశ్వసిస్తున్నాయి. ఇందుకోసం ఇప్పటికే పలు బీసీ సంఘాల బీఆర్ఎస్ ప్రజాప్రతినిధులను కలిసి బీసీ రిజర్వేషన్ కోసం సీఎం కేసీఆర్ కార్యాచరణ రూపొందిస్తే తామంతా కలిసిపోరాటం చేస్తామని తెలిపినట్టు విశ్వసనీయ వర్గాల సమాచారం.