ఒకవైపు నిరుద్యోగుల ఆందోళనలు.. మరోవైపు రైతుల ఆత్మహత్యలు.. వాటికితోడు కరెంటు కోతలు, తాగునీటి వెతలు.. బదిలీల అక్రమాలపై రోడ్డెక్కుతున్న ఉద్యోగులు.. పూరిస్థాయిలో రుణమాఫీ జరగక ఆందోళనలో అన్నదాతలు.. ఆటోడ్రైవర్ల ఆత్మహత్యలు, నేతన్నల బలవన్మరణాలు.. రోజుకో సమస్య ముందుకొస్తున్న తరుణంలో నేటినుంచి రాష్ట్ర శాసనసభ సమావేశాలు ప్రారంభం కానున్నాయి.
Assembly Session | హైదరాబాద్, జూలై 22 (నమస్తే తెలంగాణ): రాష్ట్ర శాసనసభా సమావేశాలు మంగళవారం ఉదయం 11 గంటల నుంచి ప్రారంభంకానున్నాయి. సభ ప్రారంభం అనంతరం కంటోన్మెంట్ శాసనసభ్యురాలు లాస్యనందిత మృతికి సభ సంతాపం తెలపనున్నది. సభ వాయిదా అనంతరం బీఏసీ సమావేశం జరుగనున్నది. ఈ నెల 25న రాష్ట్ర బడ్జెట్ను అసెంబ్లీలో ప్రవేశపెట్టనున్నారు. అదే రోజు ఉదయం 9గంటలకు అసెంబ్లీ కమిటీ హాల్లో క్యాబినెట్ సమావేశమై బడ్జెట్కు ఆమోదం తెలుపనున్నది.
శాసనమండలి సమావేశాలు ఈ నెల 24 బుధవారం ఉదయం 10 గంటల నుంచి ప్రారంభంకానున్నాయి. అసెంబ్లీ సమావేశాల్లో రైతు భరోసా చర్చిస్తామని, జాబ్ క్యాలెండర్ ప్రకటిస్తామని సీఎం రేవంత్ రెడ్డి ఇప్పటికే ప్రకటించారు. ఆర్వోఆర్ కొత్త చట్టం తీసుకురానున్నారని సమాచారం. సమావేశాలకు పోలీసులు నాలుగు అంచెల కంచెల విధానాన్ని అమలు చేస్తున్నారు.
పబ్లిక్ గార్డెన్ బస్స్టాండ్ దగ్గర భారీ ఎత్తుతో కంచెలను ఏర్పాటు చేశారు. అసెంబ్లీ లోపలికి వెళ్లే దగ్గర రెండు రకాల కంచెలను ఏర్పాటు చేశారు. ప్రభుత్వం ఏర్పడిన కొత్తలో కంచెలను తొలగించామని ప్రకటించిన ప్రభుత్వం… అందుకు విరుద్ధంగా గతంలో కంటే ఎక్కువగా కంచెలను ఏర్పాటు చేసిందని ప్రతిపక్షాలు విమర్శిస్తున్నాయి.
అసెంబ్లీ సమావేశాలు ఆగస్టు 2 లేదా 3వ తేదీతో ముగించే అవకాశాలున్నాయని అంచనా వేస్తున్నారు. ఈనెల 25న బడ్జెట్ ప్రవేశపెట్టిన మరుసటి రోజున ఆనవాయితీ ప్రకారం 26న సెలవు ఇవ్వనున్నారు. ఆదివారం నగరంలో బోనాలు ఉండటంతో ఆ రోజు కూడా సెలవు ఇవ్వనున్నారని సమాచారం. ఈనెలాఖరు కల్లా బడ్జెట్ను ఉభయ సభలు ఆమోదించి గవర్నర్ ఆమోదానికి పంపించాల్సి ఉంటుంది. గతంలో ప్రవేశపెట్టిన ఓట్ ఆన్ అకౌంట్ బడ్జెట్ ఈనెలాఖరుతో ముగియనున్నది. ఈ నేపథ్యంలో మొదట బడ్జెట్కు సభ ఆమోద తెలపాల్సి ఉంది.