Telangana Assembly Elections | హైదరాబాద్ : తెలంగాణ అసెంబ్లీ ఎన్నికల్లో విచిత్రం చోటు చేసుకుంది. బీజేపీ ఎంపీలుగా కొనసాగుతూ, అసెంబ్లీ ఎన్నికల బరిలో దిగిన ముగ్గురు ఓటమి పాలయ్యారు. ఆ మాదిరిగానే అసెంబ్లీ ఎన్నికల్లో పోటీ చేసిన ముగ్గురు కాంగ్రెస్ ఎంపీలు గెలుపొందారు. ముగ్గురు బీజేపీ ఎంపీలు బీఆర్ఎస్ అభ్యర్థుల చేతిలో ఓడిపోయారు.
మల్కాజ్గిరి ఎంపీగా ఉన్న రేవంత్ రెడ్డి కొడంగల్ నుంచి పోటీ చేసి గెలుపొందారు. భువనగిరి ఎంపీగా ఉన్న కోమటిరెడ్డి వెంకట్ రెడ్డి.. నల్లగొండ అసెంబ్లీ స్థానం నుంచి విజయం సాధించారు. నల్లగొండ పార్లమెంట్ సభ్యుడిగా ఉన్న ఉత్తమ్ కుమార్ రెడ్డి.. హుజుర్నగర్ నుంచి ఎమ్మెల్యేగా గెలుపొందారు. ఈ ముగ్గురు కూడా బీఆర్ఎస్ అభ్యర్థులపై విజయం సాధించారు.
నిజామాబాద్ ఎంపీగా కొనసాగుతున్న ధర్మపురి అరవింద్.. ఈ ఎన్నికల్లో కోరుట్ల నుంచి బరిలో దిగారు. కోరుట్లలో బీఆర్ఎస్ అభ్యర్థి డాక్టర్ సంజయ్ చేతిలో అరవింద్ ఓడిపోయారు. ఇక కరీంనగర్ ఎంపీగా కొనసాగుతున్న బండి సంజయ్.. అదే అసెంబ్లీ నియోజకవర్గం నుంచి పోటీ చేశారు. బీఆర్ఎస్ అభ్యర్థి గంగుల కమలాకర్ చేతిలో బండి చిత్తుగా ఓటమి చవిచూశారు. ఆదిలాబాద్ ఎంపీగా ఉన్న సోయం బాపురావు.. బోథ్ నుంచి పోటీ చేశారు. బోథ్లో బీఆర్ఎస్ అభ్యర్థి అనిల్ జాదవ్ గెలుపొందారు.