జనగామ: ఛానల్ పేరుతో బ్లాక్ మెయిలింగ్.. బెదిరింపులకు పాల్పడుతున్న తీన్మార్ మల్లన్న తెలంగాణకు నయా నయింలా తయారయ్యాడని జనగామ ఎమ్మెల్యే పల్లా రాజేశ్వర్రెడ్డి ఆరోపించారు. గురువారం వరంగల్-ఖమ్మం-నల్గొండ జిల్లాల పట్టభద్రుల ఎమ్మెల్సీ బీఆర్ఎస్ అభ్యర్ధి ఏనుగు రాకేశ్రెడ్డితో కలిసి జనగామలో బీఆర్ఎస్ ముఖ్య నాయకులు, పట్టభద్రుల సన్నాహాక సమావేశంలో పల్లా రాజేశ్వర్రెడ్డి పాల్గొన్నారు.
ఈ సందర్భంగా పల్లా మాట్లాడుతూ.. పట్టభద్రుల ఎమ్మెల్సీ ఎన్నికల్లోనూ అనేక సందర్భాల్లో తీన్మార్ మల్లన్న తనను అనేక రకాల ఇబ్బందులు పెట్టాలని చూశాడని తెలిపారు. ఉన్నత విద్యావంతుడు రాకేశ్ రెడ్డిపై కాంగ్రెస్ పార్టీ ‘చార్సౌబీస్’ గాడిని పట్టభద్రుల ఎమ్మెల్సీ అభ్యర్ధిగా నిలబెట్టిందని విమర్శించారు. అందుకే విద్యావంతులు, మేధావులు ఆలోచించుకొని ఓటు వేయాలని సూచించారు. అధికార పార్టీకి జీహుజూర్ అనే తీన్మార్ మల్లన్న కావాలో.. నిరుద్యోగుల గొంతుకగా ప్రశ్నించే రాకేశ్రెడ్డి కావాలో విజ్ఞతతో ఆలోచించాలని పల్లా రాజేశ్వర్రెడ్డి విజ్ఞప్తి చేశారు. ఎప్పుడు కీలక సమయంలో ఎన్నిక వచ్చినా ప్రజలంతా బీఆర్ఎస్ వైపు నిలబడ్డరని పల్లా అన్నారు. గత ఎన్నికల్లో తనకు వ్యతిరేకంగా 70 మంది పోటీపడ్డారని.. అయినప్పటికీ తనను గెలిపించారని తెలిపారు. ఇప్పుడు కూడా ప్రజలు రాకేశ్ రెడ్డిని ఆశీర్వదిస్తారన్న నమ్మకం ఉందని ధీమా వ్యక్తం చేశారు.
కాంగ్రెస్ ప్రభుత్వం జాబ్ క్యాలెండర్ ఇస్తామని చెప్పింది.. కానీ ఇవ్వలేదని పల్లా రాజేశ్వర్ రెడ్డి అన్నారు. 50 వేల మెగా డీఎస్సీ వేస్తామని చెప్పారు ఏమైందని ప్రశ్నించారు. 10 వేల పోస్టులకు నోటిఫికేషన్ ఇచ్చి మభ్యపెట్టారని మండిపడ్డారు. కాంగ్రెస్ అసమర్ధ పాలనతో ఇప్పటికే తెలంగాణకు నష్టం జరిగిందని ఆవేదన వ్యక్తం చేశారు. పట్టభద్రుల ఎమ్మెల్సీ స్థానంపై నాలుగు సార్లు గులాబీ జెండా ఎగరేశామని పల్లా రాజేశ్వర్రెడ్డి గుర్తుచేశారు. మోసకారులను, బ్లాక్మెయిలర్లను దూరం పెట్టి విద్యావంతులకు పట్టంగట్టే పరంపర మళ్లీ కొనసాగుతుందని ఆశిస్తున్నానని అన్నారు.