CM Revanth Reddy | హైదరాబాద్, జూన్ 21 (నమస్తే తెలంగాణ): రాష్ట్ర ప్రభుత్వ నిర్ణయాలకు సంబంధించిన అధికారిక సమాచారాన్ని మీడియాకు అందించే బాధ్యతను మంత్రులు శ్రీధర్బాబు, పొంగులేటి శ్రీనివాస్రెడ్డికి అప్పగిస్తున్నట్టు ముఖ్యమంత్రి రేవంత్రెడ్డి ప్రకటించిన నేపథ్యంలో రాజకీయ వర్గాల్లో కొత్త చర్చ మొదలైంది. ఇతర మంత్రులను ముఖ్యంగా ముగ్గురు సీనియర్లను కట్టడి చేసేందుకే సీఎం రేవంత్రెడ్డి ఇలాంటి నిర్ణయం తీసుకున్నారనే అభిప్రాయం వ్యక్తమవుతున్నది. క్యాబినెట్లోని కొందరు సీనియర్ మంత్రులు తన మాట వినడం లేదని, మీడియాకు తరుచూ లీకులు ఇస్తున్నారని సీఎం భావిస్తున్నట్టు రాజకీయ వర్గాల్లో కొన్నాళ్లుగా గుసగుసలు వినిపిస్తున్నాయి. ప్రభుత్వం అంతర్గతంగా తీసుకుంటున్న నిర్ణయాలు, చర్చిస్తున్న అంశాలను కూడా కొందరు అత్యుత్సాహంతో బయటికి చెప్తుండటంతో నష్టం వాటిల్లుతున్నదని సన్నిహితుల దగ్గర అసహనం వ్యక్తంచేసినట్టు సమాచారం. మరోవైపు కొందరు మంత్రులు సైతం తమ శాఖకు చెందిన సమాచారం ఇతర మంత్రులు ఎలా చెప్తారంటూ సీఎంకు ఫిర్యాదు చేసినట్టు గుసగుసలు వినిపిస్తున్నాయి. ఈ నేపథ్యంలోనే అధికారిక సమాచారాన్ని అందించే బాధ్యతను ఆ ఇద్దరు మంత్రులకు అప్పగించారని చెప్పుకుంటున్నారు. మంత్రులంతా తమ శాఖల అంశాలను మాత్రమే మాట్లాడాలని సీఎం ప్రెస్మీట్లో చెప్పిన సంగతి తెలిసిందే. దీంతో మంత్రులు ఇతర అంశాలు మాట్లాడొద్దని కట్టడి చేయడంతోపాటు ఒకవేళ మాట్లాడినా వాటికి ఎలాంటి విలువ ఉండదని సీఎం బహిరంగంగానే చెప్పినట్టయ్యింది. అయితే, ఈ నిర్ణయం ఎవరిని ఉద్దేశించి తీసుకున్నారనే చర్చ మొదలైంది. ముగ్గురు సీనియర్ మంత్రులను కట్టడి చేసేందుకే ఈ నిర్ణయం తీసుకున్నారని గుసగుసలు వినిపిస్తున్నాయి. వారు ప్రెస్మీట్ పెట్టినప్పుడు అన్ని అంశాలపై మాట్లాడుతున్నారని, తమకు సన్నిహితులైన జర్నలిస్టులకు లీకులు ఇస్తున్నారని సీఎం దృష్టికి వచ్చినట్టు చెప్పుకుంటున్నారు. ఈ నేపథ్యంలోనే ‘కట్టడి’ చేసేందుకు ఈ నిర్ణయం తీసుకున్నట్టు సమాచారం.
మీడియాకు వరుసగా లీకులు ఇస్తుండటంపై క్యాబినెట్ సమావేశంలో చర్చించినట్టు తెలిసింది. సీఎంతో మంత్రుల సమావేశాలు, క్యాబినెట్ సమావేశాలు, ఉప సంఘం సమావేశాల సందర్భంగా జరిగే చర్చల గురించి ఎట్టి పరిస్థితుల్లోనూ బయటికి చెప్పొద్దని ముఖ్యమంత్రి స్పష్టంచేసినట్టు విశ్వసనీయ వర్గాలు తెలిపాయి. విషయాలు బయటికి వెళ్తే మంత్రుల మధ్య అనైక్యత ఉన్నదని బయట చర్చ జరుగుతున్నదని అనుకున్నట్టు తెలిసింది. అందుకే అధికారిక సమాచారం ఇచ్చే బాధ్యతను ఇద్దరు మంత్రులకు ఇవ్వాలని చర్చించి, నిర్ణయం తీసుకున్నారని సమాచారం. దీంతోపాటు క్యాబినెట్ సమావేశంలో బడ్జెట్పై చర్చ జరిగినట్టు తెలిసింది. కేంద్ర ప్రభుత్వ బడ్జెట్ సమావేశాలు ముగిసిన తర్వాత పెట్టాలా? లేదా కొనసాగుతుండగానే బడ్జెట్ ప్రవేశపెట్టొచ్చా? అని చర్చించినట్టు విశ్వసనీయ వర్గాలు తెలిపాయి. కేంద్ర ప్రభుత్వం బడ్జెట్ ప్రవేశపెట్టిన తర్వాత రాష్ర్టానికి ఏ మేరకు నిధులు వస్తాయో తెలుస్తాయని, కాబట్టి పార్లమెంట్ సమావేశాలు కొనసాగుతుండగానే రాష్ట్ర బడ్జెట్ను ప్రవేశపెట్టుకోవచ్చని అధికారులు చెప్పినట్టు సమాచారం. దీనిపై ప్రభుత్వం ఇంకా తుది నిర్ణయం తీసుకోలేదని తెలిసింది.