దహెగాం, జూలై 23: కుమ్రంభీం ఆసిఫాబాద్ జిల్లా దహెగాం మండలం పీకలగుండం గ్రామంలో ‘మిషన్ భగీరథ నీళ్లు రాక భగీరథ ప్రయత్నం’ శీర్షికన ‘నమస్తే తెలంగాణ’లో మంగళవారం ప్రచురితమైన వార్తకు అధికారులు స్పందించారు. ఉధృతంగా ప్రవహిస్తున్న ఎర్రవాగు దాటి చెలిమ నుంచి గ్రామస్థులు నీళ్లు తెచ్చుకుంటున్న విషయాన్ని తెలుసుకొని డీఎల్పీవో సురేశ్బాబు గ్రామాన్ని సందర్శించారు. ట్యాంకర్ ద్వారా నీటిని తెప్పించి సరఫరా చేయించారు. రెండు రోజుల్లో మిషన్ భగీరథ నీళ్లు వస్తాయని, కొత్త మోటర్ తెప్పించి మిషన్ భగీరథ నీటిని సరఫరా చేస్తామని డీఎల్పీవో తెలిపారు. అప్పటి వరకు ట్యాంకర్ ద్వారా నీటిని సరఫరా చేస్తామని చెప్పారు. వాగులోకి ఎవరూ వెళ్లొద్దని సూచించారు. వాగులోకి వెళ్లకుండా చీరలతో కంచె ఏర్పాటు చేయించారు. పీకలగుండం గ్రామంలో తాగునీటి సమస్య పరిష్కారానికి కృషి చేసిన ‘నమస్తే తెలంగాణ’కు గ్రామస్థులు కృతజ్ఞతలు తెలిపారు.