సూర్యాపేట, జూలై 22: కబ్జాకు గురైన భూమిని తిరిగి ఇప్పించాలని అధికారుల చుట్టూ తిరిగినా పట్టించుకోవడం లేదని ఇద్దరు మహిళలు సూర్యాపేట కలెక్టరేట్ ఎదుట ఆత్మహత్యాయత్నం చేశారు. బాధితులు లక్ష్మి, అరుణ వివరాల ప్రకారం.. నడిగూడెం మండలం రామాపురం గ్రామానికి చెందిన మేడం ముత్తయ్యకు సర్వే నంబర్ 190లో 2 ఎకరాల 50 సెంట్ల భూమి ఉండగా.. ఆయన కుటుంబ సభ్యులు మేడం చిట్కయ్య, మేడం వెంకటేశ్వర్లు, మేడం బాజరమ్మకు వారసత్వంగా వచ్చింది. వారు బతుకుదెరువు కోసం ఇతర ప్రాంతాలకు వలస వెళ్లగా అదే గ్రామానికి చెందిన ఇద్దరు వ్యక్తు లు కబ్జా చేసి వారి పేరు మీద పట్టా చేయించుకున్నారు.
సమస్య పరిష్కారం అధికారుల చుట్టూ తిరిగినా పట్టించుకోవడం లేదని, కలెక్టరేట్కు మూడుసార్లు వచ్చినా ఫలితం లేకపోయింది. ఈ క్రమంలో కుటుంబ సభ్యులు లక్ష్మి, అరుణ సోమవారం సూర్యాపేట కలెక్టరేట్కు పెట్రోల్ బాటిల్తో వచ్చి ఆత్మహత్యాయత్నం చేశారు. పోలీసులు గమనించి పెట్రోల్ బాటిల్ను తీసుకుని నచ్చజెప్పారు. కలెక్టర్ తేజస్నంద్లాల్పవార్ వారి తో మాట్లాడారు. ఆర్డీవో, తహసీల్దార్తో విచారణ చేయించి న్యాయం చేస్తామని హామీ ఇచ్చారు.
పెండింగ్ డీఏ చెల్లించాలి: ఎస్టీయూ
హైదరాబాద్, జూలై 22 (నమస్తే తెలంగాణ): ఆరు నెలలకొకసారి చెల్లిం చే కరువు భత్యం (డీఏ) రెండున్నరేండ్లుగా అమలు కావడంలేదని, తక్షణమే చెల్లించాలని ఎస్టీయూ రాష్ట్ర అధ్యక్షుడు ఎం పర్వత్రెడ్డి, ప్రధానకార్యదర్శి జీ సదానందంగౌడ్ ప్రభుత్వాన్ని సోమవారం ఒక ప్రకటనలో డిమాండ్ చేశారు. పెండింగ్ డీఏతోపాటు పీఆర్సీపై మంత్రిమండలిలో చర్చించి నిర్ణయం తీసుకోవాలని ప్రభుత్వాన్ని కోరారు. ఉపాధ్యాయ ఉమ్మడి సర్వీస్ నిబంధనలు రూపొందించాలని పేర్కొన్నారు.